Pas videos enigmatike të publikuar pak ditë më parë, ku vendoste “X” mbi opsionet tradicionale si televizioni, muzika dhe aktrimi, janë zbuluar detaje të reja mbi rikthimin e Romeo Veshajt. Burime pranë emisionit “UëTëFë Show” bëjnë me dije se aktori dhe moderatori ka marrë një vendim të rëndësishëm për të ardhmen e tij profesionale, duke zgjedhur t’i përkushtohet plotësisht botës dixhitale.
Sipas informacioneve, Romeo ka vendosur të ndërtojë një platformë në YouTube, e konceptuar si një “mini-media” personale, ku do të ketë kontroll të plotë mbi përmbajtjen dhe formatet që do të zhvillojë. Në qendër të këtij projekti të ri do të jetë një emision mëngjesi, i cili pritet të drejtohet personalisht prej tij. Formati do të jetë i frymëzuar nga stili radiofonik, me biseda të lira, tema aktuale dhe komunikim të drejtpërdrejtë me publikun.
Por kaq nuk mbaron gjithçka. Burimet bëjnë të ditur se në këtë sipërmarrje të re nuk përjashtohet edhe rikthimi i një formati “Late Night Show”, i ngjashëm me programin e njohur “Më lër të flas”, që Romeo e prezantoi më herët së bashku me Donald Veshajn në Top Channel dhe që u kthye në një nga emisionet më të ndjekura të kohës.
Mesa duket, “X”-i i publikuar në video simbolizon pikërisht këtë kapitull të ri, larg kornizave tradicionale dhe më pranë lirisë krijuese. Rikthimi i Romeo Veshajt pritet të sjellë një frymë ndryshe në hapësirën online dhe të zgjojë interesin e publikut që e ka ndjekur ndër vite.
