Fëmijët e shkollës 9-vjecare në Mengel të Elbasani dhe prindërit e tyre kanë nisur të protestojnë për hapjen e shkollës së dëmtuar nga tërmeti para një viti.
“BalkanWeb” raporton se protesta ka nisur qe prej orës 12:00 dhe vijon ende, ndërsa gjendja shëndetësore e fëmijëve është rënduar, pasi janë të lodhur dhe të uritur.
Protestuesit janë ulur sot në mes të rrugës dhe kanë bllokuar qarkullimin në aksin kombëtar Elbasan-Librazhd dhe për pasojë kanë krijuar radhë të gjata automjetesh.
Në pamjet e siguruara nga ‘BalkanWeb’, shihen fëmijët të cilët qajnë, madje një nga ata është plagosur në fytyrë.
Në protestë merr pjesë edhe deputeti i PD, Luciano Boci, ndërsa në disa raste ka pasur konfrontime mes protestuesve dhe policisë. Nënkryetari i bashkisë së Elbasanit, Klevis Xhoxhi i shoqëruar nga drejtues të Drejtorisë së Policisë Vendore ka mbërritur te protestuesit për të negociuar. Gjithashtu Drejtori i policisë, Altin Qato është takuar me deputetin e PD Luçiono Boçi.
Sipas specialistëve, shkolla e Menglit ka nevojë për rikonstruksion forcues të strukturave pasi rrezikon të shembet. Në të tillë situatë nxënësve u është siguruar transporti falas deri në shkollat e qytetit, por rreth 200 nxënës e kanë bojkotuar.
