Agjensia Europiane e Edukimit (EURYDICE), ka publikuar së fundmi raportin për “tarifat studentore dhe sistemet e mbështetjes 2020-2021”. Në këtë raport, të cilin e ka publikuar Komisioni Evropian (KE), përfshihet edhe Shqipëria së bashku me vendet e tjera kandidate për në BE.
Sipas krahasimit të të dhënave në universitetet publike në vendet e BE-së, rezulton se tarifat studentore të ciklit të parë në universitetet publike, në nivelin bachelor, Shqipëria i ka më të lartat në krahasim edhe me vendet si Polonia, Kroacia, Çekia, Greqia, Gjermania, apo Sllovenia, Franca, Belgjika, Austria, etj.
Shqipëria po ashtu bën dallim edhe me vendet fqinje të rajonit, ku përsëri ka tarifa më të larta se sa Kosova, Maqedonia e Veriut, Greqia, Serbia, përjashto Malin e Zi, i cili nuk ka tarifa fare.
Një tjetër element që bie në sy në raportin e KE, i cili ndahet në dy pjesë, ku pjesa e dytë i referohet mbështetjes ndaj studentëve, është fakti se Shqipëria rezulton si vendi me më pak mbështetje ndaj studentëve në Europë, gjë të cilën e ilustron edhe një grafik.
Së pari, klasifikohemi ndër të paktat vendet europiane ku 100% e studentëve paguajnë të paktën 100 euro tarifë vjetore për ciklin bachelor me kohë të plotë.
Në pjesën dërrmuese të vendeve europiane kjo normë është nën 100%, duke qenë se shumë studentë marrin mbështetje nga entet publike, në bazë të meritës a nevojës.
Veç kësaj, Shqipëria klasifikohet si një vend me 0% grante publike ndaj studentëve. Vetëm 6 shtete të kontinentit të vjetër e kanë zero këtë normë.
Studentëve shqiptarë të ciklit bachelor me kohë të plotë nuk iu ofrohet asnjë bursë në bazë të meritës në universitet publike, ndryshe nga shumë vende europiane, thotë raporti i Komisionit Europian.
Edhe në mbështetjen ndaj prindërve të studentëve, nëpërmjet reduktimit të taksave apo formave të tjera, si dhe në drejtim të huave studentore, Shqipëria nuk ofron asgjë.
Këto të dhëna shqetësuese tregojnë edhe një herë se arsimi i lartë publik në vendin tonë është shumë larg standardit që duhet të jetë.
Po ashtu prezenca e shtetit duket të jetë inekzistente, pasi rezultojmë ndër vendet me tarifat më të larta në Europë, edhe pse infrastruktura në arsimin e lartë publik lë shumë për të dëshiruar, në të njëjtën kohë që nuk u ofrohet asnjë ndihmë financiare studentëve, qoftë me bazë nevojë, apo qoftë me bazë merite./Iconstyle.al/
