Rama sqaron shpërblimin 1000 euro për mjekët që luftojnë COVID-19! Ja kush përfiton

Kryeministri Edi Rama ka sqaruar se cilat do të jenë kategoritë e bluzave të bardha që do të përfitojnë shpërblimin prej 1000 eurosh për punën e tyre në përballjen me COVID-19.

Përmes një reagimi në Twitter, kreu i qeverisë i ka kthyer përgjigje personelit të urgjencës së spitalit rajonal të Lezhës, i cili ka refuzuar shpërblimin prej 5 mijë lekësh të reja të dhënë nga qeveria për muajin mars.

Rama shprehet se 1000 euro do të marrin mjekët e infermierët në vijën e zjarrit, pra bluzat e bardha në spitalet COVID 1 dhe 2 dhe ata në autoambulanca.

“Unë e kam thënë shqip që do të paguajmë 1000€ mbi pagën për mjekët e infermierët në Vijën e Zjarrit! Kush ka ngatërruar vijën e zjarrit në spitalet Covid e në autoambulanca, me detyrën e bluzës së bardhë në territor, duhet të kthjellohet e të mos turpërojë bluzën e bardhë!“, shkruan kryeministri.

Rama thotë më tej se “kush i nxit nga jashtë kërkesat për shpërblime pa asnjë sens bën politikën e mbrapshtë që ka bërë gjithnjë dhe do ndëshkohet nga populli, kush nga brenda bëhet mashë politike cënon misionin e shenjtë e moralin e bluzave të bardha në këtë luftë dhe nuk do të justifikohet në vijim!”

Më herët, personeli i urgjencës së spitalit rajonal të Lezhës ka refuzuar shpërblimin prej 5 mijë lekësh të reja të dhënë nga qeveria për muajin mars.

Ata u shprehën se kërkojnë që këto para të shkojnë për familjet me nevojë, pasi pretendojnë se ju ishin premtuar 500 euro dhe 1 mijë euro për periudhën e emergjencës së COVID-19.

/Iconstyle.al