Qytetarët grumbull në treg, Rama ashpërson masat: “Ndëshkim deri në heqje lirie!”

Disa pamje që u publikuan sot në media nga tregu i Kombinatit në Tiranë, janë bërë shkas që kryeministri Edi Rama të ashpërsojë masat e frenimit të koronavirusit.

Duke qenë se sot në orën 13:00 do të mbyllen të gjitha aktivitetet deri të hënën, qytetarët u dyndën të bëjnë blerjet e fundit.

Si rrjedhojë e mos respektimit të rregullave, kreu i qeverisë ka bërë me dije se nga e hëna policia dhe ushtria do të krijojnë kordonë sanitarë për blerësit në tregje.

Në njoftimin e fundit në Facebook, Rama bën me dije se nëse nuk respektohet distanca, atëherë do të ketë ndëshkime deri në heqje lirie.

Statusi i plotë i kryeministrit:

NËSE KY ËSHTË NIVELI I KUPTIMIT TË DETYRËS NJERËZORE, QYTETARE E ATDHETARE, NË FRONTIN E KËSAJ LUFTE PËR JETË A VDEKJE DHE MEQË MESA DUKET ECURINË POZITIVE TË LUFTËS DERI TANI, SHUMËKUSH PO E KUPTON GABIMISHT SI ARSYE PËR T’U LËSHUAR ME IDENË SE S’NA GJEN GJË, ATËHERË PËRGJIGJA E SHTETIT DO TË JETË RECIPROKE PËR KËDO QË NUK DO TË HYJË NË RRESHT PËR TË MBAJTUR RADHË!

? USHTRIA DHE POLICITË BASHKIAKE DO TË KRIJOJNË URGJENTISHT KORDONËT SANITARË TË TREGJEVE. POLICIA E SHTETIT DO TË GODASË SHKELËSIT ME MASA TË REJA NDËSHKIMORE!

? MASAT E REJA NDËSHKIMORE DO TË JENË LIGJ DITËN E HËNË DHE PËR KOKËSHKRETËT DO TË SHKOHET DERI NË HEQJE LIRIE! NËSE DO TË LEHTËSOJMË ME PIKATORE POPULLIN E PËRGJEGJSHËM, KOKËSHKRETËVE DO T’UA BËJMË FERR KËTË VIJË TË SHTREMBËR SJELLJEJE QË NA FUT NË ZJARRIN E FERRIT TË GJITHËVE!

*Tirana është vatra më e rrezikshme e luftës. Durrësi njësoj si Tirana mund të kthehet në Vaterlonë tonë. Shkodra është tanimë një bombë me sahat. Fieri është një rrezik i madh potencial. Kudo mund të na iki avantazhi që kemi krijuar, nëqoftëse do ta bëjmë si Kombëtarja Kuqezi që pjesën e parë duket sikur do fitojë, pastaj… Harrojeni, këtë luftë nuk kemi për ta humbur për ata që s’kanë mendje dhe këllqe të luftojnë si mbarë populli shqiptar.