iconstyle.al > Bukuri > Keshilla Bukurie > Qeshni pa frikë sepse rrudhat rreth syve paskan një efekt fantastik

Qeshni pa frikë sepse rrudhat rreth syve paskan një efekt fantastik

Shkenca na ka dhënë një arsye më shumë për të vlerësuar linjat e bukura dhe rrudhat. Sipas një studimi të ri nga Universiteti Perëndimor në Ontario, rrudhat rreth syve të shkaktuara nga buzëqeshja jonë na bëjnë të dukemi më të sinqertë. Pikërisht kjo karakteristikë na bën që të lidhemi më mirë emocionalisht me njëri-tjetrin.

Studimi i ri i botuar në revistën “Emotion”, përqendrohet në buzëqeshjen “Duchenne”, një karakteristikë e shkaktuar nga aktivizimi i njëkohshëm i muskujve të fytyrës. Kjo shkaktohet nga një muskul i veçantë i fytyrës që ngre mollëzat lartë dhe zvogëlon sytë duke shkaktuar rrudha. Buzëqeshja “Duchenne” është shpesh pjesë e shprehjeve të caktuara emocionale, në raste gëzimi, por në disa raste edhe shprehje dhimbjesh dhe trishtimi.

Mirëpo studimi i fundit na bën optimistë dhe ekspertët thonë se kjo lloj buzëqeshje ekziston për një arsye të mirë. Studiuesit rekrutuan 28 pjesëmarrës në studim dhe u treguan atyre fotografi të shprehjeve të fytyrës së manipuluar, disa me efektin e buzëqeshjes “Duchenne”  dhe disa pa këtë efekt. Ata vlerësuan si më të sinqerta fotografitë me buzëqeshjen e gëzuar apo të trishtuar “Duchenne”, se sa ato pa këtë efekt.

Hulumtuesit duke përdorur një teknikë të quajtur rivaliteti vizual, u treguan pjesëmarrësve dy fotografi në të njëjtën kohë, një për secilin sy. Rivaliteti vizual detyron trurin të ndryshojë mes dy imazheve: ajo tenton të përqendrohet më shumë dhe më shpesh në atë që e sheh si më të rëndësishme.

Pjesëmarrësve iu kërkua të shtypnin butonat që korrespondonin me secilin imazh për të matur sa shpesh, gjatë 40 sekondave, ata perceptonin ose një ose të dy imazhet. Rezultatet treguan se kur u paraqitën dy fotografi, një me efektin e buzëqeshjes “Duchenne” dhe një pa këtë efekt, truri i pjesëmarrësve u përqendrua më shumë në të parën.

Autorja kryesore Dr. Nour Malek, tha se përfundimet e studimit japin dëshmi të “një gjuhe të mundshme universale” për të lexuar emocionet njerëzore dhe sinqeritetin.

“Identifikimi i buzëqeshjes ‘Duchenne’ mund të jetë një mënyrë se si njerëzit mund të vendosin nëse buzëqeshja e një të huaji është e vërtetë dhe nëse ata mund t’i besojnë njëri-tjetrit”, shtoi ajo.

“Që nga Darvini, shkencëtarët janë pyetur nëse ekziston një gjuhë e shprehjes së fytyrës dhe ky hulumtim sugjeron se një çelës për këtë gjuhë është shtrëngimi i syve”, tha Dr Daniel Messinger, bashkautor i studimit dhe profesor i psikologjisë në Universitetin e Miamit.

Edhe në studimet e mëparshme është theksuar se buzëqeshja “Duchenne” lidhet me simpatinë dhe besueshmërinë. Kështu që ju mund të buzëqeshni pa problem dhe pa menduar për rrudhat që iu krijohen gjatë kësaj kohe. Pikërisht këto rrudha komunikojnë më shumë se sa fjalët.

Burimi: Health

Nuk janë emaile të mërzitshme!

Regjistrohu për të zbuluar të vërtetat e të famshmëve dhe trendet e momentit.