Gjatë podcastit “Shëndeti në rend të parë”, i mbështetur nga United Hospital, specialistja e radiologjisë, Shkëndije Nuza, ka sqaruar disa keqkuptime të përhapura lidhur me mamografinë, radiografinë (rëntgenin) dhe ekzaminimet CT, veçanërisht për rrezatimin dhe sigurinë e këtyre metodave diagnostike.
Sipas Nuzës, “si radiografia ashtu edhe skaneri (CT) funksionojnë me rrezatim jonizues. Po ashtu edhe mamografia përdor rrezatim, por ajo thekson se: ‘Mamografia ka një dozë jashtëzakonisht të ulët ekspozimi, shumë më të ulët se CT-ja dhe rëntgeni klasik’”. Ajo sqaroi se rrezet absorbohen kryesisht nga kockat, pasi ato përmbajnë më shumë kalcium. “Indet e gjirit nuk kanë strukturë kockore, prandaj edhe doza e nevojshme për të bërë mamografinë është shumë e ulët”, shtoi Nuza.
Specialistja theksoi gjithashtu se nuk ekziston asnjë punim shkencor zyrtar në botë që vërteton se mamografia shkakton kancer të gjirit.
Sipas protokolleve mjekësore, mamografia bëhet zakonisht pas moshës 40 vjeç. Nuza sqaron: “Nuk rekomandohet më shpesh se një herë në vit në rast se nuk ka gjetje patologjike. Në rastet e zakonshme, çdo dy vjet është e mjaftueshme. Nën moshën 40 vjeç, mamografia nuk rekomandohet, përveç në raste të veçanta, kur ekziston një anamnezë familjare shumë e fortë për kancer gjiri (p.sh. nëna, motra, gjyshja, tezja). Vetëm gratë me zinxhir të fortë familjar të prekjes nga kanceri mund të bëjnë mamografi para moshës 40 vjeçare, pasi konsiderohen grup i rrezikut të lartë”, përfundoi Nuza.
Ky sqarim i specialistes vjen në një kohë kur ka shumë paqartësi dhe keqinformim lidhur me sigurinë e ekzaminimeve radiologjike, duke theksuar rëndësinë e kontrollit të rregullt sipas protokolleve mjekësore.
