Banorët e Unazës së Re kanë zgjedhur të protestojnë ditën e sotme përpara Parlamentit dhe nuk kanë munguar përplasjet e shumta mes tyre dhe policisë. Banorët kanë tentuar të çajnë me forcë rrethimin e policisë për të hyrë në parlament, ku po mbahej edhe seanca plenare duke përdorur mjete tymuese dhe piro teknike.
Për pasojë, 6 policë kanë mbetur të lënduar nga mjetet e forta të përdorura prej banorëve dhe një prej tyre ka dëmtime të rënda në krah. Ata janë marrë nga ambulanca dhe janë transportuar në spital, ndërkohë që sipas “Ballkanweb” disa protestues janë shoqëruar në komisariat.
Banorëve të Unazës së Re, i janë bashkuar edhe ata të Shkozës, të cilët i kërkojnë qëverisë të mos preken shtëpitë e tyre, ose në të kundërt të dëmshpërblehen me vlerën e tregut.
Rreth Parlamentit është krijuar edhe një kordon policie me qëllim ruajtjen e institucionit, pasi në Kuvend sot do të diskutohet buxheti 2019 si dhe do të votohet ministri i Brendshëm Sandër Lleshaj pas dekretimit nga Meta.
Burimi: Ballkanweb
