Aktet e dhunës nga policia e shtetit në protestat për vrasjen e një të riu, që po ashtu ju mor jeta nga një efektiv, kanë qenë prezentë për ditë me radhe dhe të gjithë jemi dëshmitarë të kësaj gjëje. Qytetarët kanë denoncuar përmes videove e fotove të ndryshme pasojat e dhunës të ushtruar nga policët pa asnjë lloj shkaku (sepse rikujtojmë se protesta është një e drejtë themelore e çdo qytetari në një shteti demokratik). Por nga cila polici u dhunuan qytetarët shqiptarë? Nga policia turke?
Po, policia turke e lexuat shumë mirë!
Si të mos mjaftonin aktet dhe skenat e dhunës, policia jonë ka zbarkuar në protestë e veshur me uniforma të policisë turke dhe madje mburoja xhami të shkruara në turqisht. Kjo është cilësuar si një skandal, madje një precedent i turpshëm për policinë e shtetit shqiptar.
Policia shqiptare pa identitet dhe në shkelje me ligjin!
Nëse një i huaj do të shikonte këto pamje do të mendonte se protesta është organizuar në Turqi dhe se policia ka bërë arrestime në emër të shtetit turk. Me uniforma të tilla, policia jonë jo vetëm që është pa identitet dhe abuzon me detyrën, por është edhe në shkelje të plotë me ligjin.
Në Rregulloren e Policisë së Shtetit të miratuar me vendim VKM-je në vitin 2015 për veprimet e ndaluara të punonjësve të policisë së shtetit në nenin 37, pika 6 seksion a shkruhet qartazi që atyre iu ndalohet përdorimi i veshjeve policore të policive të vendeve të tjera. Gjithashtu në të theksohet se policëve u ndalohet të heqin simbolet, emblemën, gradat, stemat dhe shenjat e tjera dalluese nga uniformat që kanë në përdorim.
Ku shkuan miliona euro për uniformat e policisë?
Për 6 vite (2013-2019) qeveria ka shpenzuar plot 7.8 milionë euro për uniformat e policisë, të cilat janë prezantuar gjithmonë me bujë të madhe duke organizuar ceremoni madhështore. Në të njëjtën periudhë kohore, qeveria ka hapur në total 29 tendera për uniformat e policisë, 9 prej tyre të anuluar, dhe si përfundim efektivët dalin e ndeshen më qytetarët me uniforma e simbole të policisë turke.
Vetëm në gusht të vitit të shkuar, qeveria Rama vendosi të shpenzojë 23 milionë euro për uniformat e reja të policisë për katër vitet e ardhshme, domethënë deri në 2023-shin. Kjo do të thotë se për 4 vitet e ardhshme do të shpenzohen 3-fish më shumë për uniformat se në gjashtë vitet e fundit.
Kryeministri dhe ministrat e qeverisë janë shprehur të keqardhur këto ditë për dhunën e shkatërrimet në kryeqytet, duke theksuar se gjithçka do të riparohet me taksat e shqiptarëve. Po kur bëhet fjalë për të tilla vjedhje kaq abuzive pse nuk shqetësohet askush, apo këto nuk dalin nga paratë e shqiptarëve?!