Futbollisti i ri i Vushtrria FC, Erjon Morina, ka ndërruar jetë në moshën 22-vjeçare pas një sulmi në zemër që pësoi gjatë stërvitjes me klubin e tij disa ditë më parë. Ai u nda nga jeta më 12 dhjetor, duke lënë pas një dhimbje të thellë për familjen, miqtë dhe kolegët e tij. Lajmin e ka konfirmuar babai i tij, i cili e shprehu dhimbjen e tij në një postim emocionues në rrjetet sociale: “Ylli babit ike në qiell. Na thave zemrat Erjon! Do jetojmë të ngrysur me kujtimet më të bukura për ty! Do jesh ylli që do na ndriçon gjithmonë.”
Erjoni e nisi karrierën e tij futbollistike te FC Prishtina dhe ka luajtur për disa skuadra të tjera në Kosovë, përfshirë Besa Pejë, Drenica, 2 Korriku, Llapi, Malisheva, Ulpiana, dhe së fundmi ishte pjesë e Vushtrrisë. Tragjedia e tij ka tronditur botën e futbollit kosovar, duke lënë një boshllëk të madh në mesin e atyre që e njohën dhe e donin.
