Vjeshta e 2018-s nuk do të jetë aspak një stinë e mërzitshme sa i përket veshjes dhe stilit.
Kombinimet më të papara të ngjyrave do t’i japin gjallëri pamjes suaj, duke ju bërë që të mos i qëndroni besnik vetëm ngjyrave neutrale të tokës apo të zezës.
Për t’i dhënë një larmishmëri stilit tuaj këtë sezon vjeshte, “iconstyle.al” sjell kombinimet më të bukura të ngjyrave për të cilat do t’ju duhet të guxoni.
Besniket e ngjyrës rozë, të kuqe dhe jeshile do të jenë më të kënaqurat, ndaj mos u dëshpëroni pse vera ka mbaruar.
Jeshile gurkali + E kuqe
Veshjet monochrome, pra të njëjta nga koka te këmbët do të jenë trendi i sezonit. Kjo jeshile gurkali duket edhe më bindëse ndaj një aksesor i kuq si kjo çantë mesi, duket perfekt në trupin e kësaj fashioniste.
Rozë + E kuqe
Dy nga ngjyrat më të forta që e bëjnë veshjen dhe dukjen tuaj të duket akoma më bindëse. Vishe rozën me hijeshi dhe kombinoje me një aksesor në ngjyrë të kuqe si sandalet.
Blu + E kuqe + Leopard
E kuqja dhe bluja mund të jenë kombinimi më i famshëm ndër vite, por këtë sezon guxoni me një palë këpucë apo aksesor leopard dhe do të bëni një kombinim që nuk ua kanë zënë sytë më parë.
Kafe + Rozë + Blu
E ku ka më mirë sesa t’i japësh ndriçim ngjyrës kafe me dy tonalitete të forta si roza çiklamin dhe blu saksi? Ky super kombinim do t’ju bëjë të dukeni sikur keni zbritur nga pasarelat e modës.
Rozë + Jeshile Ushtarake + Gri metalizato
E dimë që në teori thjesht nuk shkojnë me njëra tjetrën, por këto pantallona në ngjyrë jeshile ulliri me këtë bluzën ngjyrë rozë pjeshke, kombinohen perfekt me një palë sandale gri.
Jeshile + Rozë + E bardhë
Kombinimi më i ëmbël që do t’ju zënë sytë në këtë artikull. Ngjyra jeshile bën një kontrast të lehtë me rozën dhe të dyja bashkë bëhen një dyshe e pandarë.
Bezhë + E bardhë + E zezë
Për ju që nuk jeni fanse të ngjyrave të ndezura, atëherë e zeza e bardha dhe bezha përbëjnë kombinimin më klasik të sezonit.
