Një hapësirë e re në kryeqytet është gati për të mirëpritur qytetarët pranë Kalasë së vjetër të Tiranës.
Kalaja e Tiranës do të quhet ky mjedis argëtimi prej 1800 metrash katrorë ku do të vendosen dyqane për ofrimin e produkteve që promovojnë trashëgiminë kulturore.
“Kalaja e Tiranës do të shërbejë si një mjedis bashkëjetese midis të vjetrës dhe të resë, mjedis kulinarie, artizanati, orientim shijesh, arti, mode”, thuhet në faqen zyrtare në Instagram.
Ky ambient që do të hapet së shpejti, është ndërtuar si një risi mes të vjetrës me të renë, për të promovuar vlerat, traditën, artin, arkivat e ndryshme, kostumografinë, folklorin, vallen, veglat muzikore, kurset e ndryshme deri te tezgjahu.
Në këtë hapësirë kulturore e tregtare, do të ketë dyqane suveniresh me fokus historinë e Tiranës, mozaikë, restorante tradicionale etj.
Për ta bërë atë më të qasshme do të ndërtohet edhe një rrugë e re në shërbim vetëm të këmbësorëve, që do ta lidhë atë me Unazën dhe “Rrugën e Elbasanit”.
