Pas gjashtë ditësh përballje të ashpër me zjarrin, situata në Delvinë, Finiq dhe Gjirokastër është vënë më në fund nën kontroll por gjurmët e shkatërrimit janë të thella dhe do të duhen javë, ndoshta muaj, për t’u përballuar.
Rreth 60 kilometra katrorë janë djegur, përfshirë ullishte, vreshta, banesa dhe çdo formë jete bujqësore e blegtorale. Mbi 1,000 banorë u detyruan të largoheshin nga shtëpitë e tyre në Delvinë dhe Finiq, dhe vetëm tani po nisin të rikthehen për të vlerësuar humbjet dhe për të marrë masa stabilizimi.
“Unë kam 76 vjet mbi supe dhe s’kam parë kurrë kështu zjarr,” thotë një banor i moshuar i Delvinës. “Zoti na ruajt, po kjo ishte ditë e zezë.”
Zjarrfikësit, bashkë me forcat e ushtrisë dhe vullnetarët, luftuan me orë të tëra në kushte të pamundura, pa pajisje të mjaftueshme, pa pushim, me terrene të pakalueshme dhe me flakë që nxiteshin nga era dhe temperaturat ekstreme. Helikopterët kryen misione të pamundura ajrore, ndërsa në tokë, mjetet ishin të pakta për përmasat e zjarrit.
Parku natyror “Syri i Kaltër”, një nga perlave turistike të jugut, mbetet i mbyllur për publikun për shkak të rrezikut të riaktivizimit të flakëve. Të njëjtin rrezik e paraqesin edhe zonat mbi fshatin Varfaj dhe mali Golik në Tepelenë. Megjithatë, në Dropull, Përmet dhe Tepelenë, vatrat që dje ishin ende aktive tashmë janë shuar plotësisht.
Autoritetet vendore janë të qarta: Delvina dhe Finiqi nuk kanë kapacitete financiare për të përballuar pasojat e një katastrofe të tillë. Ndihma shtetërore dhe ndoshta edhe ajo ndërkombëtare do të jetë e domosdoshme.
