Një zjarr i madh ka përfshirë pasditen e së martës një kompleks banimi përballë spitalit “Nënë Tereza” në Tiranë, duke shkaktuar panik mes banorëve dhe dëme të konsiderueshme materiale.
Flakët kanë përfshirë fasadën e jashtme të pallatit dhe janë përhapur me shpejtësi, ndërsa tymi i dendur ka mbuluar gjithë zonën përreth. Në pamjet e siguruara nga TCH, shihen banorë që largohen me nxitim nga ndërtesa, mes tyre edhe të moshuar, ndërsa një vajzë është parë duke dalë nga pallati me qenin e saj.
Në vendngjarje kanë mbërritur menjëherë forcat zjarrfikëse dhe policia, të cilat kanë nisur evakuimin e banorëve dhe përpjekjet për shuarjen e flakëve. Sipas raportimeve, në ndihmë të operacionit është angazhuar edhe një helikopter që po hedh ujë mbi ndërtesë për të vënë nën kontroll zjarrin.
Deri më tani raportohet për disa persona të asfiksuar, përfshirë dy qytetarë dhe dy zjarrfikës, ndërsa nuk ka ende informacion zyrtar për të lënduar rëndë.https://youtu.be/oxIfsnCjZ4g?si=QkQQROS13941LCVe
Në një tjetër moment dramatik të filmuar nga kamerat, zjarrfikësit kanë arritur të shpëtojnë një të moshuar, duke e zbritur me shkallë nga pallati i përfshirë nga flakët.
Shkaqet e zjarrit mbeten ende të paqarta, ndërsa autoritetet po vijojnë hetimet për zbardhjen e plotë të ngjarjes që ka tronditur zonën pranë një prej spitaleve kryesore të kryeqytetit.
