Dje data ishte 28-nëntor, një ditë e shënuar për të gjithë shqiptarët e cilësuar edhe si “Dita e Flamurit”. Shqipëria mbush sot 108 vite që nga shpallja e Pavarësisë, më 28-nëntor të vitit 1912.
Po më 28 nëntor 1443, heroi ynë kombëtar Gjergj Kastriot Skënderbeu çliroi Krujën nga pushtimi osman dhe ngriti flamurin kombëtar mbi kalanë e saj.
Ndonëse në kushte pandemie shqiptarët kudo ndodhen u munduan të festonin në mënyrën e tyre këtë ditë të veçantë.
Edhe ujëvara e Niagarës ka marrë mbrëmjen e 28 nëntorit ngjyrat e flamurit Kombëtar Shqiptar.
Në një postim në Facebook, ambasadori i Shqipërisë në Kanada, Ermal Muça, shkruan se simboli i vendit, mori ngjyrat kuqe e zi në nderim dhe respekt të 108 vjetorit të Pavarësisë së Shqipërisë si edhe Muajit të Trashëgimisë Shqiptare në Ontario.
Ujëvara e Niagarës, simboli i Kanadasë
i njohur në mbarë botën, u ndriçua kuq e zi, me ngjyrat e Flamurit Kombëtar
mbrëmjen e 28 nëntorit, në nderim dhe respekt të 108 vjetorit të Pavarësisë së Shqipërisë si edhe Muajit të Trashëgimisë Shqiptare në Ontario.
Mirënjohje e sinqertë për autoritetet përkatëse kanadeze për bashkëpunimin dhe gjestin fisnik!
Gëzuar Pavarësinë Shqipëri!
Mbrëmjen e djeshme edhe ndërtesa më e lartë në botë Burj Khalifa, Dubai është ndiçuar me ngjyrat e flamurit tonë Kombëtar. Në ndërtesë shkruhen dhe fjalët: Dita Kombëtare në Republikën e Shqipërisë.
Sakaq, Ura e Bosforit në Stamboll pati të njëjtat ngjyra gjatë mbrëmjes së djeshme deri në orët e para të mëngjesit.
Edhe Biblioteka Kombëtare e Kosovës është ndriçuar me ngjyrat kuq e zi. Pamja mahnitëse e Bibliotekës të le pa fjalë.
