Në dukje, çdo person ka të drejtë të ndërhyjë në pamjen e vet për të ndjerë veten më mirë. Por sot, ndërhyrjet estetike nuk janë më zgjedhje e lirë – ato janë kthyer në normë shoqërore. Trendi i buzeve të fryra, hundës “perfect”, fytyrës së tonifikuar – është i padukshëm, por dominues. Në rrjete, modelet dhe influencerët promovojnë “pamjen e standardizuar”, ku të gjithë duken njësoj dhe “natyralja” është e rrallë.
E gjithë kjo krijon një presion të heshtur, sidomos për vajzat e reja, që mësojnë se për të qenë të pëlqyera duhet të jenë vizualisht të përsosura. Estetika është kthyer në një garë e vazhdueshme dhe pasiguria në motivuesin kryesor të ndërhyrjeve.
