Foglia (gjethe) quhet kjo qenushe italiane që erdhi posaçërisht në vendin tonë për të ndihmuar në operacionet e kërkim-shpëtimit.
Bashkë me trupat e shtetit italian ajo kërkoi poshtë gërmadhave për trupat e shqiptarëve që ranë viktimë pas tërmetit të madh.
“European Union in Albania” ka publikuar foton e qenushes së vogël që shihet krah një punonjësi të zjarrfikëses.
Në postimin e tyre në Facebook, kjo qenushe përshkruhet kështu:
“Kjo është Foglia. Një qen kërkimi, që ka ardhur nga Italia në Shqipëri për të mbështetur ekipet që kryejnë operacionet e kërkim-shpëtimit, pas termeteve që goditën vendin në fillim të javës. Roli i Foglia-s dhe i pronarëve të saj është shumë i rëndësishëm.
Tre ekipe kërkim-shpëtimi prej më shumë se 200 vetash janë vendosur në Shqipëri, nëpërmjet mekanizmit tonë të mbrojtjes civile. Tani, po ndihmojmë duke iu përgjigjur kërkesës së Shqipërisë për më shumë mbështetje me ndihma logjistike dhe inxhinierë konstruktorë”.
