Erion Boba, vetëm 15 vjeç, ndërroi jetë dje në QSUT pas një sulmi me thikë nga një bashkëmoshatar në Durrës. Katër plagë, një prej tyre në zemër, i morën jetën nxënësit të pafajshëm, duke lënë pas një familje të shkatërruar nga dhimbja.
Gjyshja e tij, me një letër prekëse për median, tha se nipi i saj u vra dy herë: njëherë nga bashkëmoshatari dhe njëherë nga shteti, i cili nuk ofroi mbështetje për të lehtësuar dhimbjen e familjes dhe nuk ndërmori masa për të parandaluar dhunën në shkolla.
Letra e gjyshes së Erionit
Ai u vra dy herë!
Një herë nga vrasësi dhe një herë nga shteti
Asnjë reagim as nga policia,as nga media,as psikolog për të afërmit,jemi në një dhimbje që nuk po kemi më zemër ta mbajmë…kam ditë që përpiqem ta bëj mediatike të vërë dorë shteti apo dikush tjetër dhe të gjithë u vonuan,të gjithë panë një tjetër gjë më të rendesishme (politikën që po vret të rinjtë tanë)
O moj Shqipni, e mjera Shqipni…
Unë jam poete dhe po mbaj zemrën me dorë, po lutem të kemi tjerët…por më ka shkuar frika në palcë…kur do ndalojnë këto dhimbje, këto plagë për Shqipërinë tonë, për ne nënat që na dridhen këmbët…ku është ligji?
Pse dalin fajtorët nga burgu pas dy vjetësh?
Pse nuk funksionojnë psikologët nëpër shkolla të flitet për tema të tilla rrezikshmërie, jo për “gjinitë”.
Pushtetarët po vrasin kombin shqiptar…dhe unë këtë do ta them në çdo ditë timen, në çdo shkrim e varg…unë nuk do mundet askush të më ndalojë derisa të mos vriten më fëmijë në kombin tim. Jemi bërë me trauma…edhe media ka fajet e veta…populli (Ne)nuk dimë më ku ta kërkojë të drejtën… gjithsesi më lër të tfalenderoj që mu përgjigje në telefon dhe me mesazhe…fati i Erionit tonë paska qenë bota e përtejme, sepse në këtë botë paska kriminela kudo.
Ngjarja nisi pas një debati online dhe përfshiu edhe të tjerë bashkëmoshatarë, të pajisur me mjete të forta. Autori 14-vjeçar ka shprehur pendesë përpara grupit hetimor, duke thënë se nuk kishte qëllim të vriste, por vetëm të trembte viktimën.
