Rreth orës 09:30 të mëngjesit të sotëm, nxënësit e një shkolle private në Tiranë ndjenë një aromë të pakëndshme gazi, teksa shpërndahej me shpejtësi në klasa.
Me ndihmën e mësuesve, të miturit u nxorën jashtë godinës, për të parandaluar një tragjedi të mundshme. Reagimi në kohë bëri të mundur pasjen nën kontroll të situatës, ku pjesa dërrmuese e fëmijëve ndodhen në gjendje të mirë shëndetësore, përpos shokut nga ndodhia në fjalë.
Ndërkohë gjashtë nxënës shfaqën shqetësime, kollitje dhe dhimbje koke, çka solli nevojën e dërgimit të tyre në spital. Tre fëmijë ndodhen në urgjencën pediatrike, e ndërsa tre të tjerët, rreth moshës 15-vjeçare, po marrin trajtim në urgjencën mjekësore të QSUT-së.
Dy vite më parë, një skenar i ngjashëm do të zhvillohej këtë herë në një shkollë 9-vjeçare në Shkodër. Nxënësit e “Ndre Mjedës” po dëgjonin mësimin, kur krejt papritur shpërtheu një bombol gazi për ngrohje. Fatmirësisht, ndërhyrja e shpejtë e profesorit Luan Piraniqi, i cili vuri jetën e tij në rrezik, u bë e mundur shuarja e zjarrit.
Asokohe, prindërit e nxënësve shpërthyen në rrjetet sociale kundër kryetares së Bashkisë së Shkodrës, Voltana Ademi, të cilën e akuzuan për pakujdesi dhe për papërgjegjshmëri.
Katër vite më parë, momente ankthi dhe paniku do të përfshinin një shkollë të mesme në Shpenzë të Bulqizës. Rreth orës 10 e 30, në korridore dhe nëpër klasa u përhap me shpejtësi një tym që dilte nga kaldajat. 59 nxënës të ndihmuar nga mësuesit, banorët dhe prindërit u dërguan me urgjencë në Spitalin e Bulqizës.
Duke lënë pas incidentet e bombolave, nëse mund t’i cilësojmë kështu, një tjetër ngjarje shqetësuese ndodhi vitin e shkuar, në ambientet e gjimnazin “Janaq Kilica” në Fier.
Një spraj me lëndë gazi, i përdorur nga vetë nxënësit solli përkeqësimin e gjendjes shëndetësore të 58 nxënësve dhe dy mësuesve.
Pak ditë më parë, përgjegjësi i burimeve njerëzore në Ministrinë e Arsimit, Fiqiri Çifliku deklaroi se është lënë porosi që në çdo shkollë të vendit, të mos përdoret ngrohja me gaz.
“Në vend të gazit me bombol, duhet të përdoret soba me dru apo me kaldajë”, deklaroi Çifliku.
Duket thënë se sot, në kushte të jashtëzakonshme pandemie, më shumë se kurrë është i rëndësishëm zbatimi i një porosie të këtillë. Nisur nga rregullat për frenimin e përhapjes së Covid-it, dritaret e klasave duhet të qëndrojnë hapur, teksa temperaturat jashtë janë tepër të ulëta.
