Një vendim i rëndësishëm nga Gjykata e Romës ka vënë në qendër të debatit politikat e abonimit të Netflix në Itali. Sipas një njoftimi të Movimento Consumatori, gjykata ka pranuar padinë e ngritur nga organizata dhe ka konstatuar se disa klauzola kontraktuale të përdorura nga kompania janë të padrejta dhe, për rrjedhojë, të pavlefshme.
Bëhet fjalë për kushtet që i lejonin Netflix të ndryshonte në mënyrë të njëanshme çmimet e abonimeve dhe elementë të tjerë të kontratës në periudhën nga viti 2017 deri në janar 2024. Sipas vendimit, këto praktika bien ndesh me të drejtat e konsumatorëve, duke hapur rrugën për rimbursime të mundshme për mijëra përdorues.
Sipas përllogaritjeve të Movimento Consumatori, një abonent i paketës premium që ka paguar pa ndërprerje që nga viti 2017 mund të përfitojë deri në 500 euro rimbursim, ndërsa një përdorues i planit standard rreth 250 euro. Rritjet e konsideruara të paligjshme përfshijnë edhe planin bazë, i cili pësoi një shtim prej 2 eurosh në tetor 2024.
Vendimi pritet të ketë ndikim të menjëhershëm edhe në çmimet aktuale. Organizata thekson se Netflix duhet të reflektojë ulje në të njëjtën masë me rritjet e shpallura të padrejta.
Presidenti i shoqatës, Alessandro Mostaccio, paralajmëron se nëse kompania nuk vepron shpejt për të ulur tarifat dhe për të rimbursuar klientët, do të ndërmerren hapa të mëtejshëm ligjorë, përfshirë një padi kolektive për të garantuar kthimin e shumave të paguara padrejtësisht.
