Ditën e nesërme më 23 qershor përfundon gjendja e fatkeqësisë natyrore, e cila u shpall për shkak të pandemisë së Covid-19 në 24 mars, duke e vendosur vendin nën masa të rrepta sigurie, të cilat u shoqëruan me kufizim të liri-daljes, mbylljen e kufijve, mbylljen e bizneseve, shkollave dhe transportit publik.
Teksa numri i viktimave dhe të infektuarve shënoi rritje, Kuvendi vendosi shtyrjen e saj me dy muaj, deri më 23 qershor.
Por, sa mundësi ka që kjo gjendje të shtyhet sërish?
Sipas asaj që kreu i qeverisë Edi Rama tha në 2 qershor shanset janë zero.
https://www.facebook.com/edirama.al/videos/263965414846665/
Në një konferencë për mediat, Rama është shprehur se nuk do ketë një rikthim të gjendjes së fatkeqësisë natyrore në të gjithë vendin, por po shihet mundësia për të pasur një gjendje të jashtëzakonshme vetëm në zonat e plazheve, përgjatë gjithë vijës bregdetare.
“Nuk ka arsye për shtyrje të përgjithshme, por po punojnë për idenë që të ketë kufizme në zonën bregdetare. Do jetë vetëm për zonat e bregdetare, jo në Durrës, por në plazhin e Durrësit, jo në Vlorë, por në plazhin e Vlorës. Kjo është ende në diskutim dhe besojmë se do jetë një ndihmesë për të gjithë. Sot ka nisur punë dhe platforma për administrimin e plazheve. Nuk ka arsye për të shtyrë gjendjen e fatkeqësisë natyrore në të gjithë vendin”, u shpreh Rama.
Mirëpo, ky vendim do i jepte goditjen përfundimtare sektorit të turizmit dhe në mënyrë të veçantë do dëmtonte hotelet.
Vetëm tre ditë më parë Institutit i Statistikave publikoi të dhënat për tremujorin e parë në sektorin e turizmit, ku u vu re se shitjet neto në sektorin e Hoteleve kanë rënë me 7.9%.
Kjo pasi ata u mbyllën menjëherë pas rasteve të para me Covid-19 dhe u hapën vetëm në muajin maj.
Por, për shkak të mbylljes së kufijve edhe rezervimet apo aktivitetet që mund të zhvilloheshin në ambientet e tyre, u anuluan ose u shtynë për në një moment tjetër.
Më pas janë agjencitë turistike, që praktikisht ende janë pjesërisht të mbyllura pasi kufijtë ajror nuk janë hapur të gjithë dhe mungojnë shitjet e biletave apo rezervimeve të ndryshme.
Panorama në vendin tonë këtë verë duket shumë e trishtë, teksa shumë qytete nga pandemia duket se e kanë humbur shkëlqimin e tyre.
Turizmi ishte një sektor që po rritej me shpejtësi si rrjedhojë e futjes së Shqipërisë në listat e agjencive më të mëdha turistike, duke rritur kërkesën për paketa nga nordikët, polakët, çekët, izraelitët etj.
Kjo kishte nxitur interesin e biznesit vendas për të investuar në shtimin e kapaciteteve akomoduese përmes hoteleve të reja.
Sipas INSTAT, lejet e dhëna për hotele në 2019-n, i korrespondonin një vlere investimi prej më shumë se 100 milionë eurosh, shumëfishim në raport me vitin e mëparshëm, duke tërhequr dhe financimet e bankave.
Shqipëria ka hapur sezonin që në 1 qershor dhe qytetarët janë ftuar që këtë vit t’i kalojnë pushimet brenda territorit, ndërsa një ftesë e tillë iu bë edhe shqiptarëve të Kosovës pak ditë më parë.
Megjithatë një vendim i tillë është i diskutueshëm.
Së pari, sipas ekspertëve uji i detit nuk e transmeton virusin.
Së dyti, vetë Ministria e Turizmit ka hartuar një protokoll shumë strikt sa i përket masave që duhet zbatuar në plazhe për të siguruar qytetarët. Madje ky protokoll u përqafua edhe nga subjektet e hotelerisë, të cilat llogarisnin një dëm të pashlyeshëm.
Së treti, diskotekat dhe lokalet e natës ku infektimi nga Covid-19, mund të jetë tepër i madh nuk janë hapur ende kështu që nuk ekziton rrezik infektimi në këto vende.
Megjithatë, nëse do të ketë një shtyrje të gjendjes së jashtëzakonshme, e përgjithshme apo në pjesë të veçanta, kjo do të vendoset nga Komiteti i Ekspertëve.
