Tatjana e cila është nënë e 4 fëmijëve, ka denoncuar një rast mashtrimi që i është bërë familjes së saj në Borizanë.
Ajo shprehet për “Fax News” se bashkëshortit, Shkëlqim Laçi i është rrëmbyer vlera monetare prej 2 mijë eurosh nga një person që fliste në emër të imamit Elvis Naçi.
“Na mori një person në telefon, na tha do t’ju ndihmoj. Na tha se është i shoqatës së Elvis Naçit. I tha burrit tim se do të marrësh 2000 euro me vete. I tha që patjetër duhet t’i kesh tepër 2000 euroshit. Përveç biletës që premë, ato lekë i gjetëm me hallet tona, trokitëm derë më derë dhe mezi i gjetëm. Shkoi deri atje, kaloi me avion, mbërriti në Suedi. Sapo kaloi aeroportin, e priti një person që ne nuk e njohim”, tha Tatiana.
Bashkëshorti i saj ndodhet në kryeqyetin e Suedisë, ndërsa nëna me fëmijët në barakë pranë banesës nga frika e tërmetit.
“Tani ne jetojmë vetëm, jetojmë këtu bashkë me fëmijët në magazinë. Nuk kam shtëpi se na goditi tërmeti, bëri plasaritje në shtëpi. Prandaj tani jetojmë këtu dhe presim ndonjë ndihmë”, deklaroi Tatiana.
Ajo nuk e di ende se çfarë po ndodh me bashkëshortin ndërsa në banesën e saj ka frikë të hyjë me fëmijët, nga frika se mund të shembet.