Viti akademik 2019-2020 u mbyll me pakënaqësi e mangësi të shumta, për t’ia lënë vendin një viti të akademik pa një plan të mirëorganizuar. (KLIKO) Mësimi pritet të fillojë në datën 2 nëntor, ku edhe rektori i sapozgjedhur i Universitetit të Tiranës, Artan Hoxha e konfirmoi, studentët janë ende të paqartë se si do të zhvillohet në tërësi procesi mësimor.
Ditën e sotme Fakulteti i Gjuhëve të Huaja ka vendosur që vitet e dyta dhe të treta Bachelor të zhvillojnë mësimin online. Gjithashtu edhe vitet e dyta të ciklit master do ta zhvillojnë mësimin online. Ndërsa vitet e para të dy cikleve do të zhvillohen në auditore.
Ndërkohë, fakultetet e Juridikut, Ekonomikut, Shkencave Sociale, Universiteti Bujqësor i Tiranës dhe i Mjekësisë do të zhvillojnë mësim të alternuar.
Hipokrizia e Administratës së Universiteteve Publike
Një ndër pakënaqësitë që kanë studentët është fakti se ata kanë paguar tarifën vjetore, ndonëse fizikisht këtë vit e kanë frekuentuar shkollën jo më shumë se dy muaj. Mësimi në universitete nisi javën e dytë të tetorit të 2019, por u ndërpre për disa kohë në fund të nëntorit pas tërmetit fatal. Kjo ndërprerje u pasua më pas nga festat e fundvitit, për tu finalizuar në mars pas mbërritjes së Covid-19 edhe në vendin tonë. (KLIKO)
“iconstyle.al” prej kohësh e ka ndjekur me shqetësim këtë çështje, duke zbuluar nga rrëfimet e studentëve se tarifa po paguhet e plotë në një kohë kur as mësimin online nuk e kanë ndjekur, pasi ishte një kosto më vete, ku përmend ofertat e internetit, wirless, etj. (KLIKO)
Mirëpo, askush nuk e vendosi ujin në zjarr për këtë temë. Përkundrazi. Studentët prej fillimit ishin dyshues nëse mësimi në auditore do të jetë një “kurth” që ata të vijnë, të kryejnë detyrimet e vitit akademik në sekretariatet e fakulteteve dhe më pas të “ngujohen” sërish në shtëpitë e tyre me Google classrooms apo platforma si Zoom.
Por nëse viti akademik i ri do të alternohet në dy formate, në atë online dhe në formatin klasik në auditore, atëherë përse studentët duhet të paguajnë të njëjtin çmim tarife?
Duke qenë se vetëm një pjesë e vitit akademik do të shfrytëzohet në auditore dhe pjesa tjetër në platformat online të cilat kanë edhe koston e tyre shtesë për pagesën e internetit në shtëpi, përse studentët duhet të paguajnë tarifën e plotë studimore. Kujtojmë se tarifat e nivelit master në Universitetin e Tiranës janë nga më të lartat në rajon.
Sakaq rektori i sapozgjedhur i UT, Artan Hoxha, tenton që t’i shmanget përgjysmimit së tarifës vjetore në këtë periudhë pandemie, kërkesë kjo mëse e drejtë e studentëve, pasi fshihet pas argumentit se këto tarifa janë vendosur nga Pakti për Universitetin, platformë kjo e miratuar me Vendim të Këshillit të Ministrave në janar të vitit 2019-të, pas protestave të bujshme studentore në dhjetor të 2018-tës.
