Kryepeshkopi i Tiranës, Durrësit dhe i gjithë Shqipërisë, Anastas Janullatos, ka ndërruar jetë më 25 janar 2025, në moshën 95-vjeçare, në spitalin “Evangelismos” të Athinës, pas një mosfunksionimi të organeve. Lajmi u konfirmua nga Kisha Orthodhokse Autoqefale e Shqipërisë, e cila njoftoi se Kryepeshkopi ishte shtruar në Tiranë më 31 dhjetor dhe më pas u transferua në Athinë për trajtim.
Janullatos, i lindur në Pire të Greqisë më 4 nëntor 1929, mbërriti në Shqipëri në korrik 1991 dhe u emërua Kryepeshkop i Kishës Ortodokse Autoqefale të Shqipërisë në gusht 1992. Gjatë drejtimit të tij, Kisha u riorganizua pas periudhës së regjimit komunist, duke ndërtuar mbi 400 famulli, 155 kisha të reja dhe restauruar 200 të tjera. Vepra më e madhe ishte Katedralja “Ngjallja e Krishtit” në Tiranë, kisha e tretë më e madhe ortodokse në Evropë.
Janullatos gjithashtu kontribuoi në përmirësimin e marrëdhënieve Shqipëri-Greqi dhe u propozua për Çmimin Nobel të Paqes në vitin 2000. Në 2017, ai mori shtetësinë shqiptare.
Trupi i tij do të transferohet në Tiranë dhe ceremonia mortore do të caktohet pas mbledhjes së Sinodit. Pritet pjesëmarrja e personaliteteve fetarë dhe ndërkombëtarë.
