Në Gjykatën Themelore në Prishtinë është zhvilluar sot një tjetër seancë gjyqësore lidhur me vrasjen e Liridona Ademajt, rast që ka tronditur opinionin publik. Në bankën e të akuzuarve ndodhen Naim Murseli, Kushtrim Kokalla dhe Granit Plava, të cilët përballen me akuza të rënda për organizimin dhe kryerjen e krimit.
Gjatë seancës, vëmendje e veçantë mori momenti kur Naim Murselit iu paraqitën fotografi nga vendi i ngjarjes, përfshirë edhe imazhe të viktimës së ekzekutuar brenda veturës. Në mesin e provave të shqyrtuara nga trupi gjykues ishin edhe fotografi të sendeve personale dhe lodrave të fëmijëve, të mbetura në vendin e krimit.
Në dëshminë e tij, Murseli deklaroi se ngjarja kishte ndodhur si pasojë e një grabitjeje, duke theksuar se personi i armatosur kishte kërkuar vetëm telefonat dhe paratë. Ai përshkroi edhe momentet brenda automjetit, duke treguar se fëmijët ndodheshin në pjesën e pasme dhe kishin dalë nga e njëjta derë pas incidentit.
I pyetur nga gjykata lidhur me blerjen e armës nga i akuzuari Granit Plava, Murseli tha se e kishte bërë këtë për ta ndihmuar atë, pa pasur përfitim personal. Megjithatë, ai pranoi se ishte në dijeni që e njëjta armë ishte përdorur në vrasjen e bashkëshortes së tij.
Seanca u karakterizua nga tensione dhe deklarata të ndjeshme, ndërsa procesi gjyqësor pritet të vazhdojë me dëgjimin e dëshmitarëve dhe shqyrtimin e provave të tjera.
