Qarku i Shkodrës është vendosur në karantinë për 21 ditë, pas konfirmimit të rastit të parë të murtajës së ruminantëve të vegjël në zonën e Postribës. Vendimi vjen si masë parandaluese për të ndalur përhapjen e virusit që rrezikon seriozisht sektorin e blegtorisë.
Sipas drejtorit të AKU-së në Shkodër, Ramir Haderi, po punohet ngushtësisht me Autoritetin Kombëtar të Veterinarisë, ndërsa kontrollet në terren janë intensifikuar. Tregtimi i mishit monitorohet rreptësisht për të shmangur çdo qarkullim jashtë standardeve. Ndërkohë, veterinerët e AKU-së janë fokusuar në kontrollet në dyqanet e mishit dhe subjektet tregtare.
Raportohet se janë evidentuar tre vatra aktive në vend, përfshirë qarqet Dibër dhe Berat, ndërsa numri i bagëtive të ngordhura ka shkuar në rreth 200.
Fermerët shprehen të shqetësuar për dëmet ekonomike, pasi nuk lejohet shitja e mishit dhe produkteve të bulmetit jashtë qarkut. Ndërkohë, autoritetet u bëjnë thirrje të gjithë blegtorëve të zbatojnë rregullat, të kufizojnë lëvizjen e tufave dhe të raportojnë çdo rast të dyshimtë.
