Prej javësh shifrat e të prekurve nga koronavirusi në vendin tonë vazhdojnë të jenë të larta, por numri i pacientëve të shtruar në dy spitalet COVID ka rënë ndjeshëm nga 15 shtatori. News 24 ka mësuar se 1/10 e pacientëve të infektuar me koronavirus kurohen në shtëpi, duke mos preferuar të shtrohen në spital. Por kjo situatë është shqetësuese për disa mjekë infeksionistë, të cilët thonë se mjekët e familjes po ju japin pacientëve me Covid-19, që trajtohen në shtëpi, antibiotikë pa kriter.
Antibiotikët nuk mundet të luftojnë koronavirusin, sepse nuk janë të dobishëm për infeksionet virale duke përfshirë Covid-19, gripin dhe të ftohurën. OBSH-ja prej kohësh ka ngritur alarmin se të gjithë të prekurit me koronavirus duhet të heqin dorë nga përdorimi i antibiotikëve, të cilët duhet të merren vetëm me recetë nga mjeku për kurimin e infeksioneve bakteriale.
Përdorimi i tepruar i antibiotikëve shkakton më shumë vdekje
Organizata Botërore e Shëndetësisë ka paralajmëruar se përdorimi i tepërt i antibiotikëve për kurimin e Covid-19 rrit rezistencën bakteriale dhe kështu mund të shkaktojë më shumë vdekje. Vetëm një numër i pakët i pacientëve të prekur nga koronavirusi kanë nevojë për antibiotikë për të trajtuar infeksionet bakteriale dytësore.
Ky nuk është vetëm një problem për Shqipërinë, sepse në çdo vend të botës janë përdorur antibiotikët për të trajtuar pacientët e infektuar me koronavirus. Kjo është shoqëruar me mungesë të këtyre ilaçeve në disa vende më pak të zhvilluara, duke shkaktuar edhe vdekjen e parakohshme të personave që i kanë antibiotikët të domosdoshëm.
Rezistenca ndaj antibiotikëve është një problem shumë i madh edhe në Amerikë. Sipas një studimi nga Qendra Amerikane për Kontrollin e Sëmundjeve dhe Parandalimin, gati 3 milionë amerikanë, sëmuren nga rezistenca antimikrobike dhe më shumë se 350 mijë prej tyre vdesin. Kjo do të thotë se përdorimi i tepërt i antibiotikëve edhe gjatë pandemisë do e rëndojë akoma më shumë shëndetin e njerëzve, duke ulur imunitetin. Bakteret që bëhen rezistente ndaj antibiotikëve mund të çojnë në infeksione bakteriale të patrajtueshme që prekin cilindo, kudo e të çdolloj moshe.
Atëherë, çfarë duhet të bëni për të mbrojtur veten?
Duke qenë se antibiotikët janë të ndaluar në mënyrë kategorike për kurimin e koronavirusit duhet të tregoni kujdes duke respektuar të gjitha masat për të mbrojtur veten. Deri më tani nuk është aprovuar asnjë kurim me antiviral apo mjekim për Covid-19 dhe menaxhimi i sëmundjes mund të bëhet vetëm sipas shenjave që ju shfaqni.
Përveçse të ruani distancën fizike, të lani duart dhe të mbani maskën, duhet të keni parasysh dhe disa rregulla të tjera për të lehtësuar simptomat pas infektimit me koronavirus.
- Duhet të pushoni sa më shumë dhe të pini ujë që trupi të jetë i hidratuar për të luftuar infeksionin dhe shpejtuar shërimin.
- Duhet të mbani nën kontroll temperaturën e trupit duke pirë ilaçe që merren pa recetën e mjekut si paracetamol apo anti-inflamatorë të tjerë.
