Filmi “Dy gisht mjaltë” padiskutim është një nga komeditë shqiptare që ka korrur shumë sukses, ku dy protagonistët kryesorë janë këngëtarja e njohur Elvana Gjata dhe moderatori Ermal Mamaqi.
Pjesë e filmit ishte edhe aktorja e mirënjohur Marjana Kondi, e cila së fundmi ka qenë e ftuar në emisionin “Trokit” që transmetohet në “InTv”.
Ndër të tjera, ajo rrëfeu edhe sa është paguar për filmin “2 gisht mjaltë” dhe ne le të bëjmë sikur e besuam.
“U diskutua shumë online pagesa jote, ti je e kënaqur nga ajo pagesa që ke marrë?”- e pyeti moderatori Ermal Peçi.
Ndërkohë me shaka, Marjana iu përgjigj: “Sigurisht, për gjërat që kalojnë, kalojnë! Megjithatë jam shumë e kënaqur. Ajo ishte vetëm 10 euro. Kaq, nuk ishte më tepër. Ermal Mamaqi je shumë fantastik!”
Ndërsa në vijim, moderatori e pyeti nëse ajo do ta ribënte nëse do t’i jepej mundësia, dhe sërish nuk mungoi humori në përgjigjen e aktores: “Do ta bëja vetëm me një euro.”
Gjithashtu Marjana foli edhe për raportin me këngëtaren Elvana Gjata, ku theksoi: “Ishte shumë korrekte. Ishte e përgjegjshme për ato që gjironte sepse nuk pranonte vetëm një dubël, donte të jepte maksimumin e saj!”
