Imagjinojeni botën pa Madonën. Nuk mundeni, do ishte e mërzitshme. E doni apo e urreni, në vitet ’80-të Madona përfaqësonte çdo gjë që ishte “cool”, argëtuese dhe seksi. Këngëtarja italo-amerikane e prezantonte veten ndryshe sa herë që dilte në skenë.
Po të flasim për guxim, padyshim që ajo e ka. Tyl, dorashka të prera, streçe lëkure, fund balerinash, sy të zinj, kapelat; të gjitha këto i dashuruam në stilin e saj. Nuk u dashuruam vetëm me pamjen, muzikën; e dashuruam për qëndrimin dhe sjelljen prej një vajze “të keqe”. Këto të bëjnë ta harrosh komplet moshën e saj.
“Kam kuptuar që martesat nuk zgjasin në rast se e keni të përbashkët tualetin. Gjëja më e mirë e të qenurit beqare, është se s’ke pse nxjerr askënd jashtë tualetit se do privatësi.”
Apo: “Ajo çka më mungon më pak nga martesa, është emri “gruaja”. Nuk ka më keq.”
Një nga pamjet e saj më befasuese ishte në klipin e famshëm “Like a Virgin”, ku veshi një fustan nusërie dhe i vendosi sipër rripin tashmë simbol “Boy Toy”.
Elementet “Madonna”
Sigurisht duhet të falenderojmë Madonën për byzylyqet e lëkurës kur ato u bënë trend. Ajo mbante një numër të madh në të dyja duart.
Në risitë që solli Madona, mund të përmendim edhe bluzat e shkurtra. Para së gjithash, ishte Madona ajo që e zbuloi barkun në skenë.
Zgjedh ende kapelat e lëkurës që i përdorte masivisht gjatë viteve ’80-të dhe ’90-të.
Slogane pa fund në bluza, aksesorë dhe fustane. Madonës i pëlqejnë sloganet me mesazhe tepër rebele.
Vetëm një vath i madh që tregonte karakter, ishte mëse i mjaftueshëm, madje më mirë se dy.
“Ray-Ban” morën famë edhe nga Madona. Ajo i përdorte kudo.
Vëthët me kryq ishin ato që këngëtarja zgjidhte më tepër. Sigurisht, ajo përdorte simbole kishtare kudo. Ishte më seksi me prezencën e tyre.
Reçipetat në formën e konit; Jean Paul Gaultier i dizenjoi për turin e saj “Blonde Ambition”.
Shajet e lidhur në kokë ishin mënyra më e lirë për t’i kapur flokët. Madona i ktheu në trend.
*Publikuar në revistën “ICON” nr. 4
