Lewis Hamilton ka zgjedhur të mos komentojë mbi jetën e tij private, mes spekulimeve për një lidhje romantike me Kim Kardashian. Piloti 41-vjeçar ndodhet në Bahrein për testimet parasezonale të Formula 1, ku u përball me pyetje nga gazetarët lidhur me paraqitjen e tij së bashku me yllin amerikan në Super Bowl LX, më 8 shkurt.
Sipas gazetarit të Sky Sports, Ted Kravitz, Hamilton u pyet nëse e kishte shijuar më shumë shoqërinë sesa ndeshjen, por ai u përgjigj shkurt: “Është jeta ime private. Nuk po flas për këtë.” Kravitz e ndau momentin në rrjetet sociale, duke theksuar se piloti nuk kishte ndërmend të jepte detaje për çështje personale.
Hamilton dhe Kardashian, 45 vjeç, janë parë disa herë së bashku së fundmi, fillimisht në Paris në fillim të shkurtit, në atë që burime pranë tyre e kanë cilësuar si një takim romantik. Së fundmi, ata u panë të ulur pranë njëri-tjetrit në një suitë në stadiumin Levi’s gjatë Super Bowl-it, ku të pranishme ishin edhe Kendall Jenner dhe Hailey Bieber.
Burime për mediat amerikane kanë bërë të ditur se Kardashian ndihet mirë në praninë e Hamilton dhe po e shijon kohën me të, por pa ushtruar presion për të ardhmen. Megjithatë, kampioni i Formula 1 duket i vendosur ta mbajë larg vëmendjes mediatike çdo aspekt të jetës së tij private, duke u fokusuar te sezoni i ri me Ferrarin.
