Kylie Jenner është thellësisht e tronditur nga vdekja e papritur e parukierit dhe mikut të saj të ngushtë, Jesús Guerrero, i cili ndërroi jetë në moshën 34-vjeçare. Guerrero ishte i njohur për punën e tij me shumë të famshëm, përfshirë Demi Moore, Katy Perry dhe Jennifer Lopez. Ai kishte bashkëpunuar me Jenner që nga viti 2019, duke u bërë një pjesë e rëndësishme e ekipit të saj.
“Jesusi ishte më shumë se një mik për mua – ai ishte një dritë në jetën time, një burim të qeshurash, ngushëllimi, dashurie dhe mbështetjeje të palëkundur. Nuk e di si do ta kisha përballuar pothuajse dekadën e fundit pa e pasur pranë. Ai kishte një aftësi të veçantë për ta bërë edhe ditën më të rëndë të ndihej më e lehtë.
Faleminderit, Jesus, që ishe gjithmonë aty për mua, që më ngrije lart, që ishe miku im. Dhimbja e humbjes tënde është e padurueshme dhe nuk di si të vazhdoj pa ty, por e di që pikëllimi i madh vjen vetëm nga dashuria e madhe. Të kam dashur aq shumë. Ti ishe personi më i mirë, me një talent të pakrahasueshëm – një artist i vërtetë. Ke frymëzuar shumë njerëz dhe gjithmonë do ta bësh.
Fjalët e tua, e qeshura jote, mirësia jote, shpirti yt i bukur do të jetojnë përgjithmonë në zemrën time. Do t’i ruaj si thesare të gjitha momentet tona së bashku, çdo të qeshur dhe përqafim. Do të doja aq shumë të të përqafoja edhe një herë. U shtriva në shtratin tënd, ashtu siç shtriheshe ti në timin, duke biseduar për orë të tëra. Do të jepja gjithçka për një bisedë të fundit. Do të më mungosh më shumë se ç’mund ta shprehin fjalët. 222, engjëlli im.”
Në shenjë respekti dhe mbështetjeje për familjen e Guerrero-s në këtë periudhë të vështirë, Jenner ka vendosur të mbulojë të gjitha shpenzimet e funeralit dhe t’u ofrojë atyre ndihmë financiare. Lajmi për vdekjen e tij ka shkaktuar një valë ngushëllimesh në rrjetet sociale nga shumë të famshëm, përfshirë Kim Kardashian, Khloé Kardashian, Jessica Alba dhe Cassie, të cilët kanë shprehur trishtimin e tyre dhe kanë nderuar stilistin e ndjerë.
Familja e Guerrero-s ka nisur gjithashtu një fushatë për mbledhje fondesh në GoFundMe dhe ka kërkuar që ata që kanë foto ose video me të, t’i ndajnë për të mbajtur gjallë kujtimin e tij. Shkaku i vdekjes së tij ende nuk është bërë i ditur.
