Dëmtimet e lojtarëve të kombëtares shqiptare nuk kanë të sosur, pasi pas asaj të Brojës, që duket të jetë një tjetër fat i keq, gjithashtu i janë shtuar dy mbrojtësve kryesorë të ekipit. Kapiteni Berat Gjimshiti ka pësuar një dëmtim të rëndë në sy gjatë ndeshjes ndaj Udinezes, ku një përplasje me Ehizibue i shkaktoi një lëndim që kërkoi 10 qepje mbi syrin e djathtë.
Megjithatë, dëmtimi nuk është aq i rëndë sa pritej, por do ta mbajë Gjimshitin jashtë fushës për ndeshjen e ardhshme kundër Juventusit.
Po ashtu, një tjetër shqetësim ka lindur për Ardian Ismajlin, mbrojtësin e Empolit, i cili kërkoi zëvendësim gjatë pjesës së parë të ndeshjes kundër Lecces, pasi ndjeu marrje mendsh.
Sipas trajnerit të Empolit, D’Aversa, ky problem mund të lidhet me një ndërhyrje kirurgjikale që Ismajli ka pasur gjatë javës për një frakturë të dorës, e cila e ka detyruar atë të mbajë dorën të fashuar.
