Fundjava është para dhe të gjithë kemi filluar të bëjmë planet se ku do ta kalojmë. Me siguri që keni dëgjuar miqtë tuaj që njëzëri thonë se do të shkojnë në plazh në bregdetin Adriatik apo Jon, por ne iu sugjerojmë diçka ndryshe që do t’iu relaksojë dhe do e nisni javën me më shumë energji.
Jo të gjithë e njohin kanionin e Holtës, i cili është një atraksion turistik që të tërheq me natyrën e tij piktoreske, ndaj udhëtimi jonë i kësaj jave do të jetë pikërisht në këtë zonë të pa eksploruar.
Fotot marrë nga Google Map
Ku ndodhet kanioni i Holtës?
Ai gjendet në verilindje të qytetit të Gramshit, midis fshatrave Bardhaj dhe Kabash dhe është formuar nga krasti dhe erozioni i përroit të Holtës. Ky kanion ka një shtrirje prej 3 km dhe është i gjerë 15 m, ndërsa është i thellë rreth 100-150 m.
Foto marrë nga @lorenkocollari
Për të vizituar kanionin e Holtës mund të ndiqni dy rrugë:
1-Nga Tirana deri në qytetin e Gramshit mund të shkoni me çfarëdolloj makine dhe udhëtimi zgjat rreth dy orë. Më pas në Gramsh duhet të siguroni një makinë fuoristradë, pasi terreni është i vështirë dhe nuk mund të përshkohet nga çfarëdolloj makine.
2-Ndërsa mundësia e dytë është që të shkoni me makinë deri në fshatin Drizë të Elbasanit e më pas mund të shkoni më këmbë deri tek kanioni i Holtës. Nëse ndiqni rrugën e dytë do t’iu duhet të ecni më këmbë rreth 2 orë.
Çfarë na ofron kjo zonë turistike?
Kanioni i Holtës dallohet për natyrën e tij piktoreske, e cila është shumë pak e shkelur nga këmba e njeriut.
Ai arrin një thellësi mbresëlënëse dhe në shpatet anësore ka guva të shumta që ende nuk janë eksploruar. Brenda kanionit ka një ekosistem më vete me mikroklimën e tij. Ndërsa nga njëra anë e kanionit së bashku me rrymat e ujërave të ftohta që zbresin nga malet e Poroçanit, vijnë dhe të përshkojnë edhe erërat e ftohta. Fare pak metra më poshtë, në faqen përballë, në rrëzë të shkëmbit, burojnë edhe ujërat termale të ngrohta me ngjyrën dhe erën e tyre karakteristike.
Guvat e shumta që ndodhen në të dyja anët e kanionit, por edhe rrënojat e kalave në secilën anë të kanionit janë një ftesë për një fundjavë plotë aventura.
Vet mënyra se si është ndërtuar ky ekosistem përmban edhe vlera shkencore (gjeologjike, gjeomorfologjike, hidrologjike, biologjike), estetike, didaktike, ekologjike dhe turistike.
Foto marrë nga @Gramshi tek ju
Çfarë mund të bëjmë gjatë kësaj fundjavë tek kanioni i Holtës?
Nëse jeni tip aventurier dhe dëshironi të ndiqni rrugën nga Elbasani për të shkuar deri tek kanioni, mund të ushtroni dhe sportin e ecjes, “hiking”. Në momentin që do të shkoni tek kanioni do t’iu shfaqet para një atraksion turistik që iu ofron një bukuri natyrore magjepsëse, por edhe një ftesë për të eksploruar çdo shpellë të tij.
Një vizitë edhe në kalatë që ndodhen në të dy anët e kanionit nuk duhet anashkaluar për t’u njohur me historinë e paraardhësve tanë.
Eksplorimi i shpellave të shumta që ka ky kanion iu jep një adrenalinë që nuk e keni provuar kurrë më parë si dhe ju jep mundësinë të lahnei në ujërat e rrjedhshem që i pëshkojnë ato.
Foto marrë nga Google Map
Mund të ushtroni edhe sportin e “bouldering”, i cili është një sport mjaft aventuresk. Ai konsiderohet si arti i ngjitjes së shkëmbinjve pa litar, ndërsa për mbrojtje përdoren vetëm dyshek poshtë shkëmbit në të cilin do të ngjiteni.
Gjithashtu mund të shfrytëzoni edhe ujërat termale që ndodhen në të dyja anët e kanionit, për të gjithë ata që kanë probleme shëndetësore.
Jo vetëm kaq, por për të gjithë të apasionuarit pas peshkimit, ky është një ndër vendet ideale.
Fotot marrë nga Google Map
Çfarë duhet të marrim me vete?
Duhet të siguroheni që të keni me vete ujë dhe ushqime pasi do të konsumoni shumë energji. Duke ditur se do të kaloni përmes ujërave që e përshkojnë këtë kanion duhet të siguroheni që të keni me vete veshje rezervë. Rrobat e banjos nuk duhet të mungojnë kurrsesi.
