Shqipëria do të ndikohet sot nga kushte atmosferike kryesisht të qëndrueshme, me dominim të kthjellimeve dhe mot të qetë në pjesën më të madhe të territorit. Parashikimet meteorologjike tregojnë se moti do të jetë i kthjellët me vranësira të pakta dhe kalimtare, kryesisht përgjatë ultësirës perëndimore.
Ndryshe paraqitet situata në relievet malore lindore, ku do të ketë alternime të vranësirave mesatare dhe herë pas here të dendura. Gjatë orëve të mesditës deri në pasdite, në këto zona priten reshje të izoluara shiu me karakter afatshkurtër dhe intensitet të ulët.
Në zonat luginore do të ketë prezencë të mjegullës së dendur në orët e para të mëngjesit, duke reduktuar dukshëm shikueshmërinë. E njëjta situatë mund të përsëritet edhe në kohën e reshjeve në lindje.
Era do të fryjë me drejtim verilindje – veriperëndim dhe pritet të ketë një shpejtësi mesatare prej 7 m/s. Në zonat luginore dhe përgjatë vijës bregdetare, era do të jetë më e theksuar, me shpejtësi që mund të arrijë deri në 14 m/s.
Sa i përket detit, valëzimi në Adriatik dhe Jon do të jetë i lehtë deri mesatar, me forcë 1 deri në 3 ballë, duke mos krijuar probleme për lundrimet detare. Çfarë planesh keni për sot?
