Zëdhënësja e Festivalit në RTSH, Kozeta Kurti, ka reaguar pas lajmeve për censurë në përzgjedhjen e këngëve pjesëmarrëse. Ajo iu përgjigj Kastro Zizos dhe Sali Berishës, duke thënë se kënga e Kastros nuk e kishte kaluar fazën e parë. Juria ishte profesioniste dhe mbante përgjegjësi për mendimin e dhënë profesionalisht.
Ajo kërkoi që të mos i jepen ngjyrime politike artit dhe muzikës, duke iu kundërpërgjigjur Sali Berishës i cili e ka cilësuar si një kohë ku festivalet censurohen.
“Mos i përdorni artistët politikisht! Gjatë ditës së sotme, mediat janë fokusuar në një status të Z. Sali Berisha, sipas të cilit Kastro Ziso është përjashtuar nga edicioni i 56-të të Festivalit të Këngës për shkak të tekstit politik.
Kënga e Kastro Zizos nuk është përjashtuar nga Festivali. Ajo nuk ka kaluar këtë fazë të garës, njësoj si dhe afro 40 këngët e tjera, për të cilat do ishte absurde, demotivuese, detajimi i arsyeve të skualifikimit.”: shkruan Kozeta
Zëdhënësja bën të ditur se për këtë festival është angazhuar një komision me profesionit të njohur si Luan Zhegu, Makelian Kapedani, Edmond Rrapi, Sokol Marsi.
“Ata kanë votuar secili në mënyrë të pavarur dhe mbajnë përgjegjësi personale për integritetin e tyre profesional. Çdokush është i lirë të mbrojë krijimtarinë e tij artistike, por askush nuk ka të drejtë të ndotë artin me politikën. Kësaj të fundit i del teatri në të cilin interpreton çdo ditë”: shkruan më tej Kozeta.
