Koronavirusi nuk i ka trembur të gjithë shqiptarët, madje as të gjithë sektorët e ekonomisë, me gjithë krizën që ka sjellë ai. Ndërtuesit janë ajo kategori njerëzish që nuk “tremben” prej Covid-it, dhe po as sektori i ndërtimit çmimet e të cilit kanë shënuar vetëm rritje të dukshme veçanërisht në kryeqytet.
Sondazhi më i fundit i Bankës së Shqipërisë, i kryer mbi opinionet e 230 bizneseve konkludon se, Indeksi i Çmimit për Tiranën u rrit me 43.4% në periudhën e Pandemisë, krahasuar me 6 muajt e parë të vitit 2019.
Çmimet mesatare në Tiranë raportohet të jenë rritur ndjeshëm në zonat jashtë qytetit (me mbi 50%), por kanë shënuar rënie të lehtë në zonat qendrore dhe në periferi. Për zonat bregdetare, agjentët raportuan çmime mesatare rreth 15% më të ulëta në krahasim me gjashtëmujorin e kaluar, ndërsa çmimet e shitjes në zonat e tjera të vendit shfaqën ndryshime thuajse të papërfillshme.
Vëllimet e shitjeve janë rritur në zonat qendrore dhe ato jashtë qytetit të Tiranës, por kanë rënë në periferi të saj, si dhe në zonat e tjera të vendit apo zonat bregdetare.
Subjektet presin rritje të çmimeve të banesave në zonën e kryeqytetit dhe kanë pritje pothuajse neutrale në zonat e tjera të vendit. Përgjigjet neutrale zinin rreth 67% të përgjigjeve, dhe kjo strukturë pasqyrohet edhe në balancat neto me vlera të ulëta, për të gjitha zonat.
Të pyetur mbi rezidencën e blerësve, agjentët raportojnë se, rreth 35% e banesave dhe pronave tregtare, u janë shitur shtetasve me residence jashtë Shqipërisë. Rreth 1/3 e këtyre blerësve raportohen si rezidentë në Bashkimin Evropian. Raporti i numrit të pronave të shitura për jorezidentët ndaj numrit total të pronave të shitura është thuajse i pandryshuar periudhës së kaluar.
/Burimi: Scan TV/Përshtati: Iconstyle.al/
