Pavarësisht se nuk është në mënyrë të drejtpërdrejtë, ajo që bëjnë influencueset e modës në rrjetet e tyre sociale është marketing. Por tashmë nuk do të ketë më postime të pakontrolluara e të padeklaruara prej tyre.
Ato postojnë produkte të markave të ndryshme në këmbim të pagesës duke u sugjeruar ndjekësve të tyre ti përdorin ato. Dhe shembulli më i mirë i efektivitetit të këtyre produkteve është trupi i këtyre vajzave, flokët e tyre me shkëlqim, lëkura e pastër apo kombinimet e duhura.
Shumë nga personazhet publikë tashmë përfitojnë të ardhura vetëm përmes këtij marketingu. Në Shqipëri ka shumë vajza jo vetëm të famshme, si Lori Hoxha, Armina Mevlani, apo dhe blogger-e, që fitojnë të ardhura nga reklamimi i produkteve në “Instagram”.
Mirëpo, sipas një artikulli të “The Guardian”, kjo mënyrë marketingu (e padeklaruar) po fuqizohet shumë duke u kthyer në një kërcënim për rregullat e reklamës, biznesit, por edhe shëndetit të konsumatorëve, gjë që i ka detyruar autoritetet të nisin marrjen e disa hapave frenues.
Organet për mbrojtjen e konsumatorit në Mbretërinë e Bashkuar janë duke shtuar masat ndaj influencueseve të modës të “Instagram”-it, në përpjekje për të vënë nën kontroll një biznes shumë të fuqishëm që po zhvillohet në mediat sociale.
