Ju duhet vetëm një shtysë, një këshillë apo thjesht rikujtimi i disa veprimeve që realisht mund të përmirësojnë ditën tuaj. Ne ju rikujtojmë sot disa veprime që do ju përmirësonin ditën duke ju dhënë një dozë lumturie. Po tjetër, çfarë do i shtonit listës?
- Më shumë ujë. Nuk ekziston asgjë që është thënë më shpesh se kaq, por sërisht jemi të sigurt se asnjëherë nuk pimë aq ujë sa duhet. Dy litra në ditë duket si shumë, por nëse e shpërndani këtë sasi gjatë ditës, është shumë e menaxhueshme. Kjo do ju japë energji si mendërisht ashtu edhe fizikisht. Blijini vetes një shishe të vogël uji për ta mbajtur gjithmonë me vete dhe pini në punë, në mëngjes, drekë dhe darkë. Nëse e keni shishen gjithmonë me vete, do ju duket mëse normale të pini gjithë kohën.
- Mëngjesi është më i rëndësishmi! Mëngjesi është “mbreti” i ditës tuaj. Shumë mjekë e rekomandojnë gjithë kohës mëngjesin, por sërish ai është vakti që neglizhohet më shumë. Nëse i rregulloni vetes një mëngjes të shëndetshëm dhe të thjeshtë përpara se të nisni ditën, do të përfitoni shumë. Mëngjesi e zgjon metabolizmit tuaj, ju jep energji dhe pa dyshim, ju shton dozën e lumturisë.
- Krijoni lista. Një mënyrë e mirë për të nisur ditën, është të bëni një listë. Ajo duhet të përmbajë gjërat më të rëndësishme që ju keni për të bërë. Duke i vënë të gjitha mendimet tuaja, nga koka në letër, do të shihni se do të keni më shumë hapësirë për plane të reja. Këshilla jonë, është që të mbani afër një bllok të bukur shënimesh.
- Bëni pushime. Situatat mund të mbingarkohen gjatë ditës dhe gjithmonë duket e vështirë të shmanget stresi. Ndërkohë tek ju është grumbulluar një sasi e madhe energjie negative dhe lodhje. Kjo situatë mund të përsëritet shpesh, kështuqë lëreni veten në luksin e të pushuarit për pak minuta. Mund të shfrytëzoni pesë minuta për të pirë një got çaj, për të ecur pak apo për të shijuar një frut. Vetëm mos e përdorni kohën tuaj të pushimit për të qëndruar në celular apo mjet tjetër që nuk do t’ju hiqte stresin.
- Pozitivitet për një ditë më të bukur. Të gjithëve na pëlqen të trajtohemi mirë. Është në natyrën njerëzore, sidomos pas një periudhe stresuese. Ekzitojnë këshilla dhe veprime të vogla që mund t’ju ndihmojnë në përmirësimin e ditës. Një budist ofron zgjidhjet më praktike si p.sh: mendimi i 5 gjërave për të cilat jeni mirënjohës, të formoni galeri fotosh me pamje të qeta, të shijoni kafenë e preferuar, një ëmbëlsirë apo një blerje e re dhe praktike.
Nga Rea Lemnusha
