Përzieni zbutësin me bazën e grimit
Baza e grimit bën një punë të shkëlqyer në krijimin e një nuance të njëjtë në gjithë lëkurën e fytyrës suaj. Megjithatë, baza e grimit nuk mund ta kryejë punën e vet siç duhet nëse aplikohet në lëkurë të thatë. Prandaj, përzieni sasi të njëjta të zbutësit tuaj të preferuar me bazën e preferuar të grimit dhe kësisoj ofrojini lëkurës suaj një trajtim të përkryer.
Përdorni produkte me nuanca të gjelbërta
Nëse lëkura juaj skuqet vazhdimisht gjatë ditëve të ftohta, atëherë keni nevojë për produkte me nuanca të ngjyrës së gjelbërt, për ta larguar vëmendjen nga skuqja e padëshiruar. Fshehësi ose baza e grimit me nuancë të lehtë të ngjyrës së gjelbër janë zgjedhje e përkryer. Nëse nuk përdorni bazë grimi mund ta provoni zbutësin me nuancë të gjelbërt.
Përdorni balsam të trashë, për ta mbrojtur grimin dhe lëkurën
Balsami ju ndihmon që ta mbroni lëkurën nga ajri i ftohtë dhe i thatë, duke parandaluar çarjet dhe skuqjen e lëkurës. Gjithsesi, sigurohuni që të përzgjidhni balsam që përshtatet me lëkurën tuaj.
Përdorni grim të qëndrueshëm ndaj ujit
Moti i ftohtë mund të bëjë që nga sytë tuaj të rrjedhin lot, që më pas mund t’ua prishin produktet tuaja të grimit. Për ta parandaluar një gjë të tillë është e rëndësishme të përzgjidhni grim të syve që është i qëndrueshëm ndaj lëngjeve.
Aplikoni maskë në fytyrë, një natë para grimit
Gjithsesi, kjo vlen vetëm për ditët e veçanta, kur, nëse planifikoni që ta aplikoni grimin në mëngjes, duhet ta ‘qerasni’ veten me një maskë fytyre. Është e rëndësishme që maska që përzgjidhni ta hidratojë lëkurën, në mënyrë që grimi që e aplikoni të qëndrojë i paprekur përgjatë gjithë ditës.
Aplikoni një shtresë të pudrës së tejdukshme mbi grim
A ju ka ndodhur ndonjëherë që pasi keni mbërritur në vendin e punës të shihni që pjesë të grimit kanë rënë mbi gardërobën tuaj? Nëse po, atëherë pudra e tejdukshme është shpëtimi juaj, që ju ndihmon që ta rehatoni grimin tuaj, gjatë sezonit të ftohtë të dimrit.
Aplikoni buzëkuq me ngjyrë rozë
Gjatë ditëve të ftohta të dimrit fytyra zakonisht duket e zbehtë, gjë të cilën mund ta shmangni nëpërmjet krijimit të iluzionit të mollëzave të kuqe. Këtë gjë mund ta arrini duke aplikuar një sasi të konsiderueshme të bojëkuqit me nuancë të ngjyrës rozë.
