Mirëdita! Dua t’ju bëj një pyetje. Unë jam një tip i ndrojtur dhe gjërat (edhe kur i di në gjuhën shqipe apo në një gjuhë tjetër) nuk i shqiptoj mirë (duke e ditur që e di përgjigjen). Emocionet e këqija nuk i kontrolloj dot, ky është një minus për mua, sepse nuk më ndihmon të shprehem saktë. Ju lutem, më jepni një këshillë.
Përshëndetje e dashur lexuese! Faleminderit për pyetjen. E kuptoj që ndrojtja po të pengon të shprehësh gjërat që ti di dhe që dëshiron të thuash. Kjo duhet të jetë e vështirë për ty. Shumë njerëz mund të pengohen prej ndrojtjes dhe të mos arrijnë gjërat që dëshirojnë, pavarësisht aftësive. Ndrojtja (apo turpi) shtrembëron mënyrën sesi ne e shohim veten. Kur dikush ka ndrojtje të vazhdueshme, ai mendon negativisht gjëra si: “Unë nuk jam e aftë”, “Unë jam e parëndësishme” ose “Unë nuk jam një njeri i mirë”.
Kur ke ndjenja të vazhdueshme turpi, mund të përjetosh edhe shqetësime të tjera, si: vetëvlerësim të ulët, probleme në marrëdhëniet me njerëzit, vështirësi në punë deri edhe shqetësime më serioze. Turpi i vazhdueshëm e ka origjinën në ngjarjet e fëmijërisë, ndaj mënyra më e mirë për të punuar me turpin është të zbulohen ngjarjet që qëndrojnë në themel të këtij emocioni. Nëse nuk punohet me turpin, ai mund të kthehet në shqetësim të përhershëm.
Ti ke shkruar edhe se e ke të vështirë të kontrollosh emocionet “e këqija”. Cilat emocione? Nëse do t’i kishe emërtuar, mund të ishte më e lehtë për t’u përgjigjur. Megjithatë, duke ruajtur termin që ti ke përdorur, është më vend të them se, moskontrolli i emocioneve na e bën jetën më të vështirë. Shpesh shoqërohet me vështirësi të tjera psikologjike.
Aftësia për të kontrolluar emocionet është një aftësi e rëndësishme e njerëzve. Që në vitet e para të jetës, ne mësojmë të rregullojmë emocionet, në sajë të marrëdhënieve me prindërit. Vështirësia për t’i kontrolluar emocionet që përjetojmë mund të vijë për faktin se, që fëmijë, mund të kemi qenë të ndrojtur, por mund të ketë edhe arsye të tjera. Prandaj, duke njohur faktorët që ta shkaktojnë këtë vështirësi, ti mund të arrish në një zotërim më të mirë të emocioneve të tua. Shpresoj të të kem ndihmuar sadopak!
*Lediona Braho, psikologe klinike
Për Iconstyle.al
