Nëse mendoni se jeni më social, duke iu përkushtuar mediave sociale, atëherë gaboheni. Koha që kaloni duke u marrë me botën virtuale mund të trefishojë ndjesinë e të qenit të izoluar. Në këto përfundime doli revista “American Journal of Preventive Medicine”, që studioi sjelljet e 1.787 personave nga mosha 19-32 vjeç në SHBA.
Testet e menduara në vitin 2014 nga studiues të Universitetit Pittsburgh, në Pensilvani kishin të bënin me sasinë e kohës të kaluar , në platforma të ndryshme, si “Facebook”, “YouTube”, “Twitter”, “Instagram”, “Snapchat”, “Pinterest” dhe “LinkedIn”.
Studiuesit zbuluan se personat, që kalojnë më shumë se dy orë në ditë ishin dy herë më të prirur të ndjeheshin të izoluar, nga ana sociale në krahasim me ata që i përdorin më pak se gjysmë ore në ditë.
Për më tepër, ata që kishin vizituar platformat sociale 58 herë ose më shumë në javë, kishin tre herë më shumë rrezik që të ndiheshin të izoluar, sesa ata që i përdornin më pak se nëntë herë në javë.
Sipas autorëve të studimit, kjo vjen nga fakti që koha e shpenzuar në rrjetet sociale, zëvendëson atë të komunikimit ballë për ballë. Por, ka edhe një shpjegim tjetër përse ndjesia e përjashtimit rritet, sepse në rrjetet sociale përdoruesit shohin miqtë e tyre të argëtohen në evente të ndryshe, në të cilat ata nuk kanë marrë pjesë.
“Është e mundur që, ata që fillimisht ndiheshin të izoluar, t’iu jenë kthyer rrjeteve sociale, ose mund të ndodh që përdorimi i gjerë i platformave sociale mund të ketë bërë që disa përdorues të ndihen të izoluar nga bota reale, ose një kombinim i të dyjave”, thekson koordinuesja e këtij studimi, Elizabeth Miller.
