Numri i çifteve që përballen me vështirësi për të konceptuar një shtatzëni po rritet, dhe ky nuk është një fenomen vetëm shqiptar. Mjekët gjinekologë theksojnë se ndër faktorët kryesorë janë mosha e madhe kur çiftet vendosin për shtatzëninë e parë, patologjitë shoqëruese, si edhe stili i jetesës – duke përfshirë ushqyerjen, përdorimin e duhanit, alkoolit dhe drogave nga të dy partnerët.
Sipas doktoreshës Eliona Demaliaj, nga Spitali Universitar Obstetrik-Gjinekologjik “Mbretëresha Geraldine”, “1 në 6 çifte has vështirësi për të konceptuar një shtatzëni”. Në shoqërinë shqiptare shpesh fajësohet gruaja, por statistikat tregojnë se në 30% të rasteve shkaku lidhet me partnerin, në 30% me partneren, ndërsa në pjesën tjetër shkaqet mbeten të pashpjeguara.
Mjekët nënvizojnë se një problem i madh është stigma: shumë çifte druajnë të kërkojnë ndihmë ose e bëjnë këtë shumë vonë. “Nuk është turp të vonosh të mbetesh shtatzënë. Çiftet duhet të flasin me mjekun ose të kërkojnë ndihmën e psikologut”, tha Demaliaj.
Këto çështje u trajtuan në një konferencë të organizuar nga Spitali “Mbretëresha Geraldine”, ku mjekë shqiptarë dhe italianë ndanë përvoja mbi teknologjitë dhe qasjet njerëzore për reduktimin e infertilitetit. Në maternitetin e këtij spitali pritet të ngrihet edhe Qendra e Trajtimit të Infertilitetit dhe Prokreacionit të Asistuar, e dedikuar për çiftet që hasin vështirësi në rrugën drejt prindërimit.
