Ia vranë vajzën në mes të rrugës. Flet babai i Xhuljetës: Policia tha se do ta mbronte

Vajzës së tij iu mor jeta padrejtësisht dhe në momentin që ndodhi ngjarja, Sulejman Çuni, babai i Xhuljeta Çunit, ndodhej në Greqi. Tragjedia që ndodhi në zonën e “Don Boskos” mëngjesit e 8 qershorit në Tiranë, tronditi të gjithë opinionin publik. Maturantes Xhuljeta Çuni, e cila ishte nisur për të dhënë provimin e radhës, iu ndërpre rruga nga ish-i dashuri 31-vjeçar Xhafer Mata, i cili e ekzekutoi me armë zjarri.

Në një intervistë për gazetarin e “TV Klan”, babai i 19-vjeçares thotë se nuk kishte asnjë dijeni që vajza e tij të ketë një lidhje me 31-vjeçarin. Ndërsa, për denoncimin që e bija kishte bërë në polici ndaj tij më 7 maj, e kishin mësuar 3 ditë përpara vrasjes.

Bashkëshorten e tij e kishte telefonuar oficeri i zonës rreth datave 4-5 maj, duke i kishte dhënë garanci për jetën e vajzës, por tre ditë më pas, 2 plumba i morën jetën. Policisë iu deshën 3 javë për të njoftuar familjarët e 19-vjeçares, që prej momentit që ishte bërë denoncimi, se  ajo përndiqej nga Mata i cili pasi vrau të renë kreu vetëvrasje.

Intervista:

Çfarë dijeni keni ju për gjithë ngjarjen?

Babai: Asnjë gjë. Unë kam qenë në Greqi, vetëm kur më morën në telefon që të kanë vrarë gocën më thanë.

Ju kishit informacion se vajza juaj ishte lidhur me Xhafer Matën apo ishte ndarë?

Babai: Jo. Unë me gocën flisja natë për natë. Dy netët e fundit nuk kam folur me të.

Goca ju kishte vënë në dijeni se përndiqej nga Xhafer Mata?

Babai: Jo.

Keni dijeni që goca të ketë bërë kallëzim në Komisariatin Nr.3 ndaj Xhafer Matës?

Babai: Jo.

Unë kam një dokument këtu z.Sulejman, i cili tregon se vajza juaj i është drejtuar policisë, Komisariatit Nr.3 më datë 7 Maj 2018 dhe ka kallëzuar Xhafer Matën se e përndiqte në mënyrë të vazhdueshme në kryeqytet.

Babai: Jo, unë sot e dëgjoj për herë të parë. Nuk kam dijeni fare.

Po bashkëshortja juaj ka patur dijeni më datën 7 Maj se është bërë kallëzim?

Babai: Atë natë që erdha fola me nusen, më tha që më ka marrë në telefon i plotfuqishmi i zonës që mos ki frikë se do ta mbrojmë gocën.

Sa ditë para vrasjes?

Babai: Tre ditë para.

Pra që do të thotë rreth 28 ditë pas denoncimit. Që detyrimisht duhet t’ju kishin njoftuar në atë ditë. Po që ndaj vajzës tuaj ka patur kallëzim, keni dijeni?

Babai: Jo.

Cili është apeli juaj pas kësaj ngjarje, për shtetin, për organet ligjzbatuese, për të gjithë ata që nuk e kanë trajtuar si duhet rastin?

Babai: ……………

Burimi: TV Klan