Kjo që do t’ju tregojmë sot është një përrallë, por jo nga ato që të vënë në gjumë, por që të lënë zgjuar!
“The Handmaid’s Tale” është një serial dramë-fantazi, i bazuar në librin e vitit 1985 nga Margaret Atwood, fitues i çmimit “Emmy-Award” dhe i “Golden Globes”, që flet për historinë e një gruaje të kapur peng që detyrohet t’i nënshtrohet autoritetit të meshkujve dhe botës së krijuar sipas rregullave të tyre.
Na ishte njëherë…
Na ishte njëherë një vend i quajtur Gilead, ku gratë trajtoheshin si pronë, ku dashuria nuk lejohej, (aq më pak ajo e të njëjtit seks); ku gratë e kishin të ndaluar të punonin dhe aq më tepër të kishin para në emrin e tyre.
Të gjitha gratë në Gilead janë të ndara në klasa të ndryshme: Nëse je me fat mund të jesh Gruaja e Komandantit, e veshur me blu; më pas vijnë Martha-t që kujdesen për shtëpinë dhe vishen me gri; pastaj janë gratë pjellore, Handmaid, shërbëtoret e veshura me të kuqe që dërgohen nëpër shtëpitë e çifteve për të lindur fëmijët e tyre; dhe në fund Unwomen, ato që nuk bëjnë fëmijë dhe dërgohen për të pastruar mbetjet toksike te Kolonitë, ku edhe vdesin.
Gilead (vetë SHBA) u krijua nga disa grupe ekstremiste që besonin se Amerika duhet të shpëtohet nga mëkati dhe korrupsioni. Para se të nisnin trazirat, June kishte një familje, bashkëshortin e saj Luke, i cili u divorcua pas njohjes me të dhe u bënë prindër të një vajze. Ajo u përpoq që të largohej nga Shtetet e Bashkuara të Amerikës, por u kap dhe prej asaj dite nuk e pa më familjen e saj. Martesa iu quajt e paligjshme, pasi Luke ishte divorcuar (divorcet nuk njihen në Gilead) dhe June përfundoi në Qendrën e Riedukimit, ku mësoi sesi të bëhej një shërbëtore.
Elisabeth Moss vjen në rolin e June, ose Offred (emri i shërbëtores, Fred sipas Komandantit) një “grua pjellore” që shkon në shtëpinë e Komandantit Fred Waterford (Joseph Fiennes) dhe bashkëshortes së tij Serena (Yvonne Strahovski), të cilët nuk mund të bëhen me fëmijë. Në vizitën e saj mujore te gjinekologu, ky i fundit i thotë se Komandanti mund të jetë steril, dhe duke qenë se Gilead nuk i njeh meshkujt sterilë, ai sugjeron që të lërë shtatzënë Offred, për ta shpëtuar atë.
May the Lord Open!
E frikësuar ajo refuzon dhe shkon në shtëpi, ku i duhet të bëhet pjesë e Ceremonisë Mujore (aktit seksual): Pasi Komandanti lexon Biblën, Offred duhet të shtrihet me kokën e saj në këmbët e Serena-s, ndërkohë që Komandanti bën seks me të në prani të gruas.
Ky akt i tmerrshëm përdhunimi tregon pafuqinë e një femre që nuk mund të bëjë asgjë dhe që edhe nëse tenton të rezistojë do të ekzekutohet në sy të të gjithëve. E vetmja gjë që i mbetet të thotë Offred është “May the Lord Open”, në vend të një “Mirëmëngjesi”!
I gjithë vendi ruhet nga ata që quhen The Eye, forca të armatosura që mbikëqyrin çdo gjë. Offred nuk i ka besim askujt, dhe druhet se e spiunon edhe roja i Komandantit, Nick, një djalë i pashëm, misterioz, i cili jeton gjithashtu në shtëpi me të dhe që sa më shumë e njeh June-n aq më shumë dashurohet me të.
Por Offred nuk është e vetmja që e ka kuptuar që Komandanti nuk mund të bëjë fëmijë. Bashkëshortja e tij e vetëdijshme për këtë fakt, i kërkon Offred që të kryejë marrëdhënie seksuale me Nick, në mënyrë që të mbetet shtatzëne dhe pikërisht këtu fillon gjithçka!
SPOILER!
…………
…….
….
Offred mbetet shtatzënë me Nick, dhe fakti që i duhet të humbë një tjetër fëmijë duke ia dhënë atë Komandantit, i duket e tepërt. Ajo do të luftojë! Jo vetëm për të mbrojtur fëmijën e saj të sapolindur por edhe për të gjetur vajzën e parë. Me gjithçka që ka në dorë: falë ndihmës sigurisht nga gratë e tjera të nënshtruara si ajo, si dhe dashurisë, që e jeton fshehurazi dhe e bën të ndihet në faj për bashkëshortin Luke, i cili ndodhet shumë larg saj!
A po ndodh “The Handmaid’s tale” në jetën reale?
Ndonëse është fantazi, “The Handmaid’s tale” bazohet në disa të vërteta të hidhura që i shohim edhe në ditët e sotme, dhe madje shpesh herë Gileadi-i është krahasuar me Amerikën e Donald Trump.
Burrat që vendosin për gratë dhe abortin, shifra të larta të emigracionit, kriza e refugjatëve në Evropë, ulja e lindshmërisë në SHBA dhe ekzekutimet në Arabinë Saudite, për të mos përmendur faktin që Kim Kardashian u bë nënë e fëmijës së saj të katërt përmes një nëne bartëse.
Ok, e tepruam pak këtu, por autorja e librit, Atwood ka treguar se gjithçka që ndodh në film, ka ndodhur diku në një shoqëri dhe në një kohë të caktuar.
Nuk është e pazakontë që njerëzit të veshin sot rrobat e Handmaid në jetën reale apo të flasin me termat e tyre “Nolite te bastardes carborundorum” (Mos i lejoni bastardët t’ju shkatërrojnë).
Protestues dhe aktivistë i kanë veshur ato në protesta, për të kundërshtuar ligje të caktuara që sfidojnë autonominë e grave. Kylie Jenner i veshi për të organizuar festën e ditëlindjes së një shoqeje dhe u bë për ujë të ftohtë nga fansat!
“The Handmaid’s Tale” na sjell një histori të një vendi që na fakt nuk ekziston, por në të njëjtën kohë të bën të hasësh shumë të vërteta që i shohim çdo ditë që jetojmë!
Seriali ka tërhequr miliona shikues anembanë botës, dhe kjo është edhe arsyeja që është rinovuar për një sezon të 4-t.
