Qindra qytetarë u mblodhën në Lezhë për të përkujtuar 25-vjeçaren Xhuana Nikollaj, e cila humbi jetën në rrethana tragjike. Të pranishmit ndezën qirinj dhe vendosën lule pranë fotografisë së saj, në një atmosferë të mbushur me emocione, dhimbje dhe heshtje.
Të afërm, miq dhe qytetarë të shumtë qëndruan për disa minuta në reflektim, duke kujtuar jetën e një vajze të re që u ndërpre shumë herët. Qirinjtë e ndezur dhe buqetat me lule u kthyen në simbol të dhimbjes kolektive, por edhe të solidaritetit me familjen e saj.
Mesazhet e qytetarëve gjatë homazheve u fokusuan edhe te nevoja për më shumë ndërgjegjësim dhe reagim shoqëror ndaj dhunës që prek gratë dhe vajzat në vend. Ngjarja ka rikthyer në vëmendje debatet për sigurinë dhe mbrojtjen e tyre, veçanërisht pasi ndodhi vetëm pak ditë pas Ditës Ndërkombëtare të Gruas.
Ndërkohë, në lidhje me këtë rast, në kërkim nga policia është shpallur ish-bashkëshorti i saj, Eraldo Fizi, i dyshuar për veprat penale “dhunë në familje” dhe “shkaktim i vetëvrasjes”. Sipas informacioneve paraprake të hetimit, ai ishte kthyer nga jashtë vendit më 9 mars dhe dyshohet se ka shkuar në banesën e ish-partneres në Tiranë, ku mund të ketë pasur një përplasje mes tyre.
Një ditë më pas, në orët e para të mëngjesit të 10 marsit, 25-vjeçarja dyshohet se ka konsumuar fotoksinë. Burime nga hetimi bëjnë me dije se në trupin e saj janë konstatuar edhe shenja dhune, ndërsa në banesë është gjetur një letër që e reja u kishte lënë familjarëve.
Xhuana Nikollaj dhe Eraldo Fizi ishin martuar në qershor të vitit 2025 në Lezhë, por martesa kishte zgjatur vetëm disa muaj. Pas ndarjes, 25-vjeçarja ishte zhvendosur në Tiranë për të jetuar me motrat e saj. Hetimet vijojnë për të zbardhur plotësisht rrethanat e kësaj ngjarjeje.
