Ndërkohë që viti i ri akademik 2020-2021 pritet të fillojë në datën 2 nëntor, ku edhe rektori i sapo zgjedhur i Universitetit të Tiranës, Artan Hoxha e konfirmoi, studentët janë ende të paqartë se si do të zhvillohet në tërësi procesi mësimor.
Studentët janë në mëdyshje dhe dyshues nëse mësimi në auditore do të jetë një “kurth” që ata të vijnë, të kryejnë detyrimet e vitit akademik në sekretariatet e fakulteteve dhe më pas të “ngujohen” sërish në shtëpitë e tyre me Google classrooms apo platforma si Zoom.
Eksperienca e semestrit të dytë të vitit të shkuar akademik, ka bërë që shumica absolute e studentëve, të kenë pakënaqësi dhe ankesa në formatin e mësimit online.
Në të gjithë fazën e karantinës, studentët janë ankuar se mësimi online nuk është forma e duhur për të mësuar lëndët mësimore në fushat e tyre.
Duke qenë se edhe shifrat e rasteve të reja me Covid-19 po rriten dita-ditës, dhe gjasat janë që vendi të shkojë drejt një mbylljeje të dytë, studentët të shqetësuar kërkojnë që mos të paguajnë tarifën e plotë vjetore, pasi në rast se përsëritet skenari i mëparshëm i karantinimit ata nuk do e bëjnë normalisht procesin mësimor.
Duke u bazuar edhe në deklaratën e bërë para disa ditësh, të rektorit të Universitetit të Tiranës Artan Hoxhës, i cili tha se mësimi do të bëhet në mënyrë të gërshetuar edhe në auditore edhe në platforma online, studentët janë të pasigurtë dhe në mëdyshje për faktin se sa efektiv do të jetë edhe ky vit akademik për ta.
Shumë studentë i druhen edhe hipokrizisë së Administratës universitare dhe sekretariateve, të cilat do të kërkojnë gjatë muajit të parë të studentëve në auditore, pagesat e tarifës vjetore shkollore dhe më pas mësimi do të zhvendoset online.
Po ashtu studentët me po të njëjtin skenar i druhen edhe pedagogëve, të cilët në fillimin e vitit të ri akademik do t’i shesin librat studentëve dhe më pas këta të fundit do t’i studiojnë këto libra nga platformat online.
Kësisoj, studentët duhet t’i parandalojnë këto manovra dhe pa marrë garancinë se procesi mësimor i këtij viti do të zhvillohet siç duhet, si dhe në rast të një mbylljeje të dytë tarifat vjetore të përgjysmohen apo do të rimbursohen, të kundërshtojnë këtë farsë e cila prek të ardhmet e tyre dhe pse jo të shkojnë deri në bojkotim të plotë të këtij viti akademik./ Iconstyle.al.
