Futbolli afrikan ka humbur një nga emrat e tij më të njohur. Ish-sulmuesi i Zimbabwes, Tendai Ndoro, është ndarë nga jeta në moshën 40-vjeçare. Ai u gjet i pajetë në banesën e tij në Johannesburg, ndërsa shkaku i vdekjes mbetet i paqartë. Mediat raportojnë se kohët e fundit kishte pasur probleme shëndetësore.
Lajmin e konfirmoi klubi i tij i dikurshëm Orlando Pirates, ku Ndoro shkëlqeu me 23 gola në dy sezone dhe u shpall një nga golashënuesit më të mirë të kampionatit. Karriera e tij nisi në Zimbabve dhe vazhdoi në disa klube në Afrikën e Jugut, Arabinë Saudite dhe Oman.
Ndoro ka përfaqësuar Kombëtaren e Zimbabwes në 14 ndeshje dhe ka shënuar pesë gola, mes tyre një në Kupën e Kombeve të Afrikës 2017.
Tifozët në rrjetet sociale e kanë përkujtuar me mall dhe respekt, duke e quajtur “legjendë” dhe duke ndarë momentet më të bukura të karrierës së tij. Vdekja e tij e parakohshme ka lënë një boshllëk në futbollin afrikan dhe në zemrat e atyre që e ndoqën gjatë gjithë rrugëtimit të tij.
