Dita Botërore e Pinguinëve shënohet çdo vit më 25 prill, për të rritur ndërgjegjësimin mbi rëndësinë e ruajtjes së këtyre shpendëve të veçantë. Data përkon me migrimin e pinguinëve Adélie drejt Antarktidës, një nga 18 llojet ekzistuese të pinguinëve.
Pinguinët janë shpendë që nuk fluturojnë, por janë notarë të shkëlqyer. Jetojnë kryesisht në Hemisferën Jugore, me shumicën që ndodhen në Antarktidë, por disa specie jetojnë edhe në vende më të ngrohta si Afrika e Jugut, Zelanda e Re, Australia dhe Amerika e Jugut.
Sot në botë ekzistojnë rreth 18 lloje pinguinësh, por shumica e tyre janë të rrezikuar për shkak të ndryshimeve klimatike, ndotjes dhe mungesës së ushqimit.
Pinguinët njihen për besnikërinë ndaj partnerit, jetën në koloni dhe për faktin që kujdesen me përkushtim për të vegjlit. Ata janë një simbol i qëndresës, harmonisë dhe bashkëpunimit në kushte ekstreme.
