Gjashtë nxënës të shkollës së mesme “Janaq Kilica” në Fier u helmuan gjatë orës së mësimit këtë të premte.
Ata u dërguan në spital për kontroll mjekësor, ku ndodhen në gjendje më të mirë shëndetësore. Njëra nga nxënëset ka treguar se ngjarja ka ndodhur gjatë orës së biologjisë, ndërkohë që mësuesja po shpjegonte mësimin.
E shtrirë nga spitali, ajo tha se u ndje një erë acidi në të gjithë katin.
“Ishim në orën e biologjisë dhe profesorja po shpjegonte mësimin. Ndjemë një erë acidi dhe dolëm të gjithë jashtë. Kaq. Pastaj filloi të ndjehej në të gjithë katin. Në rreshtin e dritareve janë ato të kaldajave, ndoshta prandaj plasi”, tha ajo.
Nga ana tjetër, babai i nxënëses tha se do të denoncojë të gjithë stafin e shkollës, duke nisur nga drejtori.
“Këta nuk po na japin asnjë lloj përgjigje nga se ndodhi kjo tani. Me kë të përballemi ne tani. Erdha si baba tani unë këtu dhe s’di me kë të merrem. Na përplasën në një dhomë këtu. Pse ndodhi? U helmua nga ushqimi që i dhashë unë në mëngjes a u helmua në shkollë? U helmua nga dikush tjetër, nuk po e marrim vesh çfarë po ndodh tani. Unë do bëj denoncim me drejtor, si staf të gjithë atyre”, tha ai.
Helmimi dyshohet se është shkaktuar nga një eksperiment i bërë gjatë orës së mësimit, ku lëshimi i substancave kimike ka shkaktuar probleme shëndetësore te nxënësve.
