Harry Styles ka folur hapur për arsyen pse humbja e ish-shokut të tij të grupit, Liam Payne, ishte veçanërisht e vështirë për të. Në episodin e së mërkurës, më 4 mars, në emisionin The Zane Lowe Show, këngëtari i njohur tregoi se si po përballet me ndarjen tragjike, pasi Payne ndërroi jetë në tetor të vitit 2024 në moshën 31-vjeçare.
“Dua të jem plotësisht i sinqertë, është diçka për të cilën… edhe vetë ideja për të folur për këtë më duket pak e vështirë,” tha Styles, 32 vjeç, duke përshkruar ndjenjat e tij për humbjen. Ai kujtoi se kishte “ndjenja shumë të forta për humbjen e mikut të tij”, por ndjente edhe presionin nga të tjerët që të shprehte dhimbjen në një mënyrë të caktuar.
“Është shumë e vështirë të humbasësh një mik. Është e vështirë të humbasësh çdo mik, por është edhe më e vështirë të humbasësh një mik që në shumë mënyra është kaq i ngjashëm me ty”, shtoi Styles, duke përshkruar Payne si një “person me zemër të mirë” që gjithmonë donte të shkëlqente.
Humbja e Payne e bëri Styles të reflektonte mbi jetën e tij: “Ishte një moment shumë i rëndësishëm për mua për të parë jetën time dhe për t’i thënë vetes: ‘Mirë, çfarë dua të bëj me jetën time? Si dua ta jetoj jetën time?’”. Ai shtoi se mënyra më e mirë për të nderuar miqtë që largohen nga kjo botë është të jetosh jetën tënde në maksimum.
Një ditë pas vdekjes së Payne, më 16 tetor 2024, Styles reagoi publikisht: “Jam vërtet i shkatërruar nga ndarja nga jeta e Liam. Gëzimi i tij më i madh ishte t’i bënte njerëzit e tjerë të lumtur dhe ishte një nder të isha pranë tij ndërsa ai e bënte këtë”.
